Жастар ЖИТС туралы не біледі?

Абай атындағы Жамбыл гуманитарлық жоғары колледжінде «Біз АИТВ ЖИТС-ті білеміз, біз оны жеңеміз» атты акция ұйымдастырылды. Акция аясында облыстық ЖИТС орталығының дәрігерлері студенттерде аурудың алдын алу шаралары туралы ашып айтып берді,-деп хабарлайды «Jambyl-Taraz» ақпарат агенттігі.

 Кездесуде «Зер-Күміс» жауапкершілігі шектеулі серіктестігінің директоры Зайда Арынбаева және ЖИТС орталығының эпидемиолог дәрігері Ысқақ Мейіржан сөз сөйлеп, жастарды қауіпсіздікті қатаң сақтауға шақырды. Сондай-ақ ЖИТС-тің алдын алудағы дерек пен дәйектен бұрын, көп нәрсе ата-ана тәрбиесіне байланысты екенін баса айтты. Бұдан соң ЖИТС орталығының психологы Мереке Бегманова студенттермен бірге «АИТВ ЖИТС дегеніміз не? Аңыздар мен фактілер» тақырыбында ойын өткізді. Оған студенттер белсенді қатысып, ЖИТС-тің белгілері мен алдын алу жолдарынан хабардар екенін тағы бір мәрте дәлелдеді. Кездесу соңында колледждің жас өнерпаздары әсем ән орындаса, акцияның өтуіне қолдау көрсеткен студенттер мен дәрігерлер Алғыс хатпен марапатталды