Жамбылдағы газ өңдеу зауыты неден өртенді?
Зардап шеккендер мен қаза болғандар жоқ.
Бүгін Жамбыл облысы Жамбыл ауданы Аса ауылында «Амангелді ГӨЗ» ЖШС (газ өңдеу зауыты) Тараз филиалының аумағында өрт шығып, көпшіліктің үрейін алды,-деп хабарлайды «Jambyl-Taraz» ақпарат агенттігі Aikyn.kz сайтына сілтеме жасап.
Әлеуметтік желілерде тараған видеоларда тұрғындар мұнай зауытының жарылатынын айтып, қашып жатқанын байқауға болады. Алайда көп ұзамай облыс әкімдігі Төтенше жағдайлар департаменті тілсіз жаудың ауыздықталғаны туралы хабар таратты.
«Жалпы көлемі 480 текше метр дизель отыны бар екі резервуар өртенді.
Ол туралы Жамбыл облысы ТЖД кезекші қызметіне хабарлама 12 сағат 4 минутта келіп түскен.
Өрт орнына Жамбыл облысы ТЖД бастығы мен жедел тобы, өрт сөндіру және авариялық-құтқару жұмыстары қызметінің жедел тобы аттанған.
Тілсіз жауды ауыздықтауға барлығы 75 қызметкер мен 21 бірлік техника, сондай-ақ сол жерде құрамында 7 адам және 2 бірлік техникасы бар объектінің мемлекеттік емес өртке қарсы қызметі жұмылдырылған.
Өрт 13 сағат 5 минутта ауыздықталып, 13 сағат 17 минутта сөндірілді.
Зардап шеккендер мен қаза болғандар жоқ.
Өрттің алдын-ала себебі – мұнай өнімдерін (дизель отыны) айдау кезінде технологиялық процестің бұзылуы.
Жамбыл облысы ТЖ департаменті барлық қауіпсіздік ережелерін сақтау – төтенше жағдайлардың алдын алады және қызметкерлердің қауіпсіздігін қамтамасыз ететіндігін ескертеді» делінген департаменттің ресми ақпаратында.
