Әскерге жігіттерді көшеден ұстап әкету қаншалықты заңды?
Елімізде қазір көктемгі әскерге шақыру науқаны өтіп жатыр деп хабарлады turkystan.kz «Астана» телеарнасына сілтеме жасап.
Елордалық Ольга Нуртазина «Ұлымды көшеден ұстап алып, әскерге әкетті» деп шағымданған.
Тұрғынның айтуынша, баласын түнгі 00:00 шамасында ұстап алып, әскери бөлімшеге әкеткен.
«Көшеде кетіп бара жатқан ұлымды бұзақыны ұстағандай алып кете салды. Оның үстіне, ешкім маған ұлымның іздеуде жүргені туралы хабар бермеген. Сосын олар базадан ұлыма СМС жібергенін көрсетті. Егер ұлым шетелде жүрсе, ол Қазақстанның нөміріне қалай жауап береді деп ойлады? Олардың алдында менің құжаттарым, телефон нөмірім де тұр. Неге маған хабарласпады, ескертпеді? Соны түсінбедім», – дейді Нұр-Сұлтан қаласының тұрғыны Ольга Нуртазина.
Елімізде қазір көктемгі әскерге шақыру науқаны өтіп жатыр. Шара 30 маусымға дейін жалғасады. Сол себепті, әскери борышкерлерді анықтауға, оларды әскерге шақыру пункттеріне жеткізуге құқылымыз дейді жауаптылар.
«Көпшілік орындарда әскерге шақырушыларды анықтау, оларды әскерге шақыру пункттеріне жеткізу және қолданыстағы заң талаптарын түсіндіру жұмыстары жүргізіліп жатыр. Бұл – тек Нұр-Сұлтан қаласында ғана емес, ел бойынша жүргізіліп отырған шара. Ел Президентінің қаңтардағы қойылған тапсырмаларына байланысты әскери қызметке жастарды тарту бойынша жұмыстар мұқият қолға алынып отыр», – деді Нұр-Сұлтан қалалық Қорғаныс істері жөніндегі департаментінің өкілі Ғани Артықов.
