Шымкентте жалдамалы пәтерден бойжеткеннің қан-жоса болған денесі табылды

Шымкентте Республика даңғылы бойындағы көпқабатты үйдің жалдамалы пәтерінен қыздың мәйіті табылды. Бірнеше жерінен пышақталған бойжеткен пәтерді үш күнге жалға алған екен, деп хабарлайды «Jambyl-Taraz» ақпарат агенттігі Stan.kz сайтына сілтеме жасап.

Өңірлік «Отырар» порталының хабарлауынша, бойжеткеннің денесін 25 қараша түнгі сағат 01.30-да тапқан. Марқұм шамамен 20-25 жаста.

Пәтер иесі марқұмның үйді 3 күнге жалға алғанын айтты. Ол пәтерді жігітімен бірге жалдап тұрған болуы да мүмкін. Артынша екеуінің арасында жанжал шыққан деген болжам айтылды.

Алғашқы екі күнде бойжеткен пәтер иесімен байланысқа шыққан, ол марқұмның даусынан ерекше ештеңе байқамағанын айтады.

Алайда үшінші күні ол телефон қоңырауына жауап бермеген, соған байланысты пәтер иесі дабыл қақты. Қосымша кілтпен үй иесі есікті ашқан, ішінен қан-жоса болып жатқан қызды көрген.

Оқиға орнына келген медицина қызметкерлері оның денесі пәтер ішінде шамамен бір күн жатқанын айтты.

Түні бойы оқиға орнында жедел уәкілдер жұмыс істеді. Күдіктілер мен куәгерлер іздестіріліп жатыр. Полиция кісі өліміне қатысты басқа ақпарат таратпады.