«Шовинистік мәлімдеме»: Қазақстан депутаттары Зюгановқа қарсы үн қатты (ВИДЕО)
Ресей Коммунистік партиясының мүшесі Геннадий Зюганов Қазақстан туралы мәлімдеме жасап, еліміздегі орыстілді азаматтарды ұлтшылдардан қорғау керектігін алға тартқан. Бұл туралы 20 қаңтарда айтқан екен, алайда арада бір айдан артық уақыт өткен соң оның мәлімдемесі ел ішінде кең тарады. Коммунистік партия мүшесінің сөзінен кейін қазақстандық депутаттар өз ойларын білдірді деп хабарлады turkystan.kz Stan.kz-ке сілтеме жасап.
Бұл ретте Зюганов Қазақстан туралы айта келе, орыстілділердің қауіпсіздігіне қатысты мемлекет билігі кепіл беруі керек екенін де мәлімдеген.
«Президент пен Мемлекеттік дума мына мәселелерді талқылап, бірқатар шұғыл шешімдер қабылдауы керек: ең алдымен бұл республикадағы орыстілділерді ұлтшылдардың бассыздығынан қорғау қажет. Байқоңырдан бастап стратегиялық нысандар, полигондар сенімді қорғалуы керек. Қазақстан басшылығымен қажетті кеңестер жүргізіліп, бізге қажетті тілдік, мәдени, рухани тұрғыда қауіпсіздікке кепіл берілсін», – деді Геннадий Зюганов.
Бұған қатысты пікір білдірген ҚР Мәжіліс төрағасының орынбасары Павел Казанцев онысын «арандатушылық» деп бағалады.
«Сіздің Қазақстанға қатысты мәлімдемеңізді аса қауіпті әрі арандатушылық деп бағалаймын. Қазір барлығы аса нәзік әлемді қалай сақтап қаламыз деп жатқанда, сіз, керісінше, тағы бір тұрақсыздық ошағын жасауға тырысып жатырсыз! Бұл жолы Қазақстан-Ресей векторына қатысты. Қарым-қатынастың барлық негізгі принциптерін біздің Президент пен Ресей басшылығы айқындап қойған. Қарым-қатынасымыз тұрақты, бұл күн сайынғы тәжірибеден көрінеді. Біз жылтетпе саяси пайда үшін немесе өзін көрсетіп қалу үшін тұрақтылықты шайқауға жол бермейміз! Отпен ойнауға болмайды!» – деді Павел Казанцев.
Сонымен қатар, ол Қазақстан халқының бірлігі күшті екенін және талай сыннан өткенін алға тартты. Мәжіліс депутаты Айгүл Құспан да Зюгановтың айтқанын арандатушылық әрі шовинистік мәлімдеме деді.
«Зюганов оңтүстік Қазақстанда орыс тілін оқытпайды деп дабыл қақты. Ресей басшылығынан орыстілділерді ұлтшылдардан қорғауға қатысты шұғыл шешім қабылдауға шақырды. Оның бұл сөздері – ашық арандату. Ресейдің бейбіт әрі сенімді әріптесі Қазақстанға қатысты жауапсыз әрі шовинистік мәлімдеме», – деді Айгүл Құспан.
