ШҚО тұрғыны парақорды ұстап беріп, 4 миллион теңге сыйақы алды

Шығыс Қазақстан облысының тұрғыны пара туралы хабар беріп, 4 миллион теңгеге ие болды. Жемқорлыққа қарсы күрес қызметінің хабарлауынша, жыл басынан бері берілген ең жоғары сыйақы осы, деп хабарлайды «Jambyl-Taraz» ақпарат агенттігі  Stan.kz сайтына сілтеме жасап.

Тағы бес азамат орташа есеппен 100 мың теңгеден сыйақы алды. Айта кетейік, Қазақстанда былтыр жемқорларды ұстап берген азаматтарды ынталандыру жүйесі енгізілді.

«Параның немесе келтіріген залалдың соммасы 1 000 АЕК-дан аспайтын болса, хабар берген азамат қылмыстың ауырлығына қарай 30 бен 100 АЕК аралығында сыйақы алады.

Ал 1 000 АЕК-дан асатын пара жайлы хабар жеткізсе, сыйақының көлемі 10%-ды құрайды, бірақ 4 000 АЕК-дан аспауы тиіс. Мысалы, егер пара немесе келтірілген залал құны 50 миллион теңге болса, хабар берген адам сот шешімі шыққаннан кейін 5 миллион теңгеге ие болады», – деп хабарлады Жемқорлыққа қарсы күрес агенттігі.

Жемқорлық туралы фактіні 1424 нөміріне хабарлауға болады. Саналы азаматтар туралы ақпарат құпия сақталады.