Қостанайда бесінші сынып оқушысы өртке оранған үйден төрт баланы алып шықты

Қостанайда бала үйге терезе арқылы кіріп, кезекпен төрт баланы көшеге шығарған. Олардың ешбірі ауруханаға баруға мұқтаж болған жоқ, деп хабарлайды «Jambyl-Taraz» ақпарат агенттігі Stan.kz сайтына сілтеме жасап.

Жеке саяжай үйіндегі өрт туралы қоңырау 25 желтоқсанда сағат 11:36-да түсті, дейді Қостанай облысы ТЖД.

Өрт сөндірушілер келген кезде өрт шатырды және бөлмелердің ішін жайлаған. Үйде алты адам тұрады, бірақ ішінде ешкім болмаған.

Өрт сөндірушілер №22 орта мектептің бесінші сынып оқушысы көшеде ойнап, қою түтінді байқағанын анықтады. Бала бұл үйде үлкен отбасы тұратынын білген. Үлкен қыз сегіз жаста, ал кішісі екі жаста.

Ол өрт сөндірушілердің келуін күтпей үйге терезеден  кіріп, барлық баланы құтқарды. ТЖД мәліметінше, өрт кезінде үйде ата-аналары болмаған. Олар пешті жағып, дүкенге кетті.

Өрт сөндірушілер өртті сөндіріп, көрші саяжай учаскелеріне таралу қаупін алдын алды. Өрттің болжамды себебі пешті дұрыс пайдаланбау деп айтылды.