Медбике ретінде тіркеп, ақшасын өзі алып отырған: ШҚО-да бас дәрігер орынбасарының үстінен қылмыстық іс қозғалды
Шығыс Қазақстан облысындағы Шар қаласында аурухана бас дәрігерінің орынбасарына қатысты қылмыстық іс қозғалды. Ол коронавирус індетімен күрес кезінде бюджеттен ақша жымқырған, деп хабарлайды «Jambyl-Taraz» ақпарат агенттігі Stan.kz сайтына сілтеме жасап.
Лауазымды тұлға ауруханаға медбике ретінде қызметкерді тіркеп, тұрақты түрде еңбекақы алып келген. Қазына қаржысын ұрлаған дәрігердің әрекетін сыбайлас жемқорлықпен күрес жөніндегі облыстық департамент қызметкерлері әшкереледі.
Лауазым иесі шамамен 2,5 миллион теңге алып үлгерген. Қазір жемқорлық іске ауруханадаға басқа қызметкерлердің қатысының бар-жоғы тексеріліп жатыр.
“Осы ауруханадағы медбике ретінде адамды орналастырған. Яғни бұл адам жұмыс жасаған жоқ. Бірақ оған ай сайынғы төлемақы төленіп отырған. Сонымен қатар ковидпен күрес жөнінде комиссия шешімі негізінде бұл кісіге қанша төлем төленіп отырған. Сол себепті қазіргі таңда қылмыстық іс сотқа жолданды”, – дейді сыбайлас жемқорлыққа қарсы іс-қимыл агенттігі облыстық департаменті басшысының бірінші орынбасары Жігер Байделдин.
