Қазақстандықтар 6 миллиард теңгеге VIP-нөмір сатып алған

Қазақстандық автокөлік иелері 2021 жылы әдемі VIP нөмірлерге шамамен 6 миллиард теңге жұмсаған, – деп хабарлайды «Jambyl-Taraz» ақпарат агенттігі Tengrinews.kz сайтына сілтеме жасап.

Сандар мен әріптердің комбинациясына байланысты VIP-нөмірлердің бағасы 174 591 теңгеден басталады, ең қымбаты 872 955 теңге.

«2021 жылы қазақстандықтар жалпы сомасы 5,8 млрд теңгеге жоғары сұранысқа ие немесе VIP деп аталатын нөмірлерді сатып алған», – делінген хабарламада.

2021 жылы VIP нөмірлерге ең көп қаражат жұмсаған алматылықтар – 2,2 миллиард теңге сомасына 6882 нөмір. Екінші орында Шымкент автокөлік иелері – 818 миллион теңге сомасына 3190 нөмір, ал үштіктің соңында Нұр-Сұлтан – 667 миллион теңгеге 2231 нөмір.

2021 жылы автокөлік иелері 2020 жылмен салыстырғанда әдемі нөмірлерді көбірек рәсімдей бастаған, ол кезде 3,9 миллиард теңгеге 12 616 нөмір алынған болатын.