«Қаңтар оқиғасына кем дегенде екі жыл дайындық жүрген» – Омарова

Мәжілісте өткен жалпы отырыста заңгер Айман Омарова кәсіби дайындалған топтардың қасіретті қаңтар оқиғасына екі жылға жуық уақыт дайындалғанын мәлімдеді деп жазды turkystan.kz.

Айман Омарованың айтуынша, оқиғалар бұдан да ертерек өрбіп, ақпараттық дайындықтан басталған. Қаңтар оқиғасына кем дегенде екі жыл дайындалған. Дегенмен, лаңкестік ұяшықтар бар екені туралы ақпарат бұдан да ертерек тараған. Көбісі мұның бәрі бейбіт митингілерден басталды деп қателеседі. Шындығында, бәрі әлдеқайда ертерек басталған.

«Қаңтар оқиғасы ақпараттық дайындық, ақпараттық соғыс және көшедегі оқиғалардан тұрады. Жаппай бүлік кезінде қолданылған технологияларға, соның ішінде халықты бақылау технологияларына, халықты жинау, оларды қылмыстық құқық бұзуға бағыттауға сүйене отырып, тәртіпсіздіктерді кәсіби дайындықтан өткен топтар басқарды деп анық айта аламыз. Олардың арасында тек бейбіт тұрғындар ғана емес, арнайы қызмет те, қылмыскерлер де бар. Оқиға авторларының іс-әрекеттері, технологиясы кеңестік жедел қызметшілерді даярлау мектебінің іс-қимылдарына өте ұқсас», – деді Айман Омарова.