Ақтөбеде банк қызметкері компания шотындағы 777 млн теңгені ұрлап кеткен

Ақтөбе қаласының №2 сотында алаяқтық жасады деп айыпталған банк менеджеріне қатысты қылмыстық іс қаралды. Бұл туралы соттың баспасөз қызметі мәлімдеді деп хабарлады turkystan.kz.

Банк менеджері өзінің қызметтік жағдайын пайдаланған. Ол «С» акционерлік қоғамының есепшотынан 777 миллион теңгеден астам ақша жымқырған.

Сотта күдікті өз кінәсін ішінара мойындады. Келтірілген шығын көлемімен келіспеді. Сотталушының кінәсі сот-экономикалық сараптамасының қорытындысымен, сондай-ақ қылмыстық істің басқа материалдарымен дәлелденді, деп атап өтті соттың баспасөз қызметі.

Прокурор сотталушыны 10 жыл мерзімге банк саласында қызмет атқару құқығынсыз 6 жыл 8 айға бас бостандығынан айыруды сұрады. Сотталушының кішкентай баласы бар болғандықтан, сот жазаны жеңілдеткен.

Банк менеджері Қылмыстық кодекстің 190-бабы 4-бөлігі 2-тармағы бойынша кінәлі деп танылып, 5 жылға бас бостандығынан айырылды. Ол алдағы 10 жылда банк секторында қызмет атқара алмайды.

Соттың үкімі заңды күшіне енген жоқ.