+45 градусқа дейін ыстық: Алдағы үш күнге арналған ауа райы болжамы жарияланды

“Қазгидромет” мамандары Қазақстан бойынша 2022 жылдың 19-21 шілдесіне арналған ауа райы болжамын жариялады, деп хабарлайды Stan.kz ақпарат агенттігі.

Синоптиктердің мәліметінше, алдағы үш күнде аптап ыстық пен кей аймақтарды жаңбыр күтіп тұр.

Апта басында Қазақстан аумағының басым бөлігі солтүстік-батыс антициклонның ықпалында болады. Содан кейін 20 шілдеден бастап Солтүстік-Батыс циклон жырасының және онымен байланысты атмосфералық фронтальді бөліктердің ықпалына өтеді.

Осыған байланысты еліміздің басым бөлігінде найзағай ойнап, жел күшейеді. Батыста және оңтүстік-батыста, 20 шілдеден бастап орталықта, оңтүстікте, оңтүстік-шығыста 40-45 градус қатты ыстық күтіледі.