Қалалық қоғамдық-саяси газет

Құрылыс сапасы қала әкімінің бақылауында

0 237

Тараз қаласының әкімі Бақытжан Орынбеков №15 «Ұлы дала» ықшам- ауданындағы бірқатар нысанды аралады. Әуелі шаһар басшысы ықшам- аудандағы электр желілерін кеңейту жұмыстарымен танысты. Қазіргі таңда мұнда аталған жұмыстардың екінші кезеңі басталған. Айталық, ықшамауданда қосымша электр станциясының құрылысы жүргізілуде.

– «Ұлы дала» ықшамауданында әлеуметтік нысандар мен тұрғын үйлер саны артып келеді. Соған байланысты электр қуатына деген тәуелділік те молайып отыр. Сондықтан бұл құрылыстың сапалы әрі уақытында аяқталуы біз үшін маңызды, – деді қала әкімі.
Жалпы «Ұлы дала» ықшамауданының электр желісімен қамтамасыз етілуі 2018 жылы басталған. Бас мердігер мекемесі – «Пырақ Құрылыс» ЖШС. Нысанның құрылыс-монтаждау жұмыстары толығымен аяқталып, 2021 жылы қабылданған. Ал 2018 жылдан бастап көпқабатты тұрғын үйлердің құрылыс-монтаждау жұмыстары басталды. Алайда егжей-тегжейлі жоспарлау жобасының бірнеше рет ауысуына байланысты аталған аумақта ғимараттардың саны екі жарым есе артқан. 2018-2023 жылдар аралығында 110 көпқабатты тұрғын үйдің құрылыс-монтаждау жұмыстары аяқталып, пайдалануға тапсырылды. Осыған орай, ықшамаудандағы магистральды инженерлік желілердің қуаты жетпеуіне байланысты, желілердің кеңейту және әлеуметтік тұрғын үйлердің ішкі алаңдық инженерлік-инфрақұрылым желілерінің құрылысы ұйымдастырылды.
Қазіргі уақытта, ауызсу, кәріз, жылу, газ, электр жүйелерін қарастыру үшін қосымша кеңейту жұмыстары бойынша жоба әзірленген. Ал нысанның құрылыс-монтаждау жұмыстары басталып, 2024-2025 жылдар аралығында аяқтау жоспарлануда. Сондай-ақ ықшамаудандағы «Электр желісін кеңейту» жобасы бойынша мемлекеттік сатып алу конкурсы арқылы жеңімпаз анықталған. Мердігер мекемесі – «Таразстрой-2004» ЖШС. 2023 жылы құрылыс жұмыстарын бастау үшін жергілікті бюджет есебінен қаржының 10 пайызы қарастырылып, толығымен игерілді. Нысанның құрылыс-монтаждау жұмыс- тары 2023 жылдың 15 қыркүйек айында басталып, қазіргі уақытта жүргізілуде.
Осы орайда айта кетерлігі, бұл жоба іске қосылған соң, ықшамауданда жуыр- да пайдалануға берілетін 34 тұрғын үй мен 4 мектепті және өзге де нысандарды жарықпен толығымен қамтамасыз етеді.
Келесі кезекте шаһар басшысы ықшам- аудандағы кәріз жүйелерінің мәселелеріне қанықты. Қалдық сулары төгілетін құдық қоршалмаған әрі беті жабылмағандықтан, тұрғындардың өміріне қауіп төндіріп отыр. Оның тағы бір себебі – кәріз қақпақтарының ұрлануының жиілеуі. Бұл тұрғыда шаһар басшысы тұрғындардың қауіпсіздігін ескере отырып, түйткілдің түйінін тез арада тарқату керектігін баса тапсырды.

Құрмаш Қаптағай

Пікір қалдырыныз

Your email address will not be published.