Павлодар облысында әйелін өртеп жіберген тұрғын сотталды
Павлодар аудандық соты айыпталушыны әйелін қасақана өртеп жібергені үшін кінәлі деп танып, 8 жылға бас бостандығынан айырды, – деп хабарлайды «Jambyl-Taraz» ақпарат агенттігі Tengrinews.kz сайтына сілтеме жасап.
Іс материалдарына сәйкес, оқиға биыл тамызда болған. Розовка ауылында отбасылық жанжал кезінде ер адам тоңазытқыштан ішімдік алып, әйелінің үстіне шашып, оттықпен өртеп жіберген. Ерлі-зайыпты арасындағы кикілжің әйелі күйеуіне мас күйде көлік жүргізуге тыйым салған соң туындаған. 34 жастағы жәбірленуші жансақтау бөліміне түсіп, кейін қайтыс болды.
«Сотталушы адам өліміне әкеп соқтырған денсаулыққа қасақана ауыр зиян келтіргені үшін кінәлі деп танылды. Ол 8 жылға бас бостандығынан айырылды», – деді Павлодар облыстық сотының баспасөз қызметі өкілдері.
Сот айыпталушының берген жауабына күдікпен қарады.
Айта кетейік, жәбірленуші тарап айыпталушыға ең төменгі мерзім беруді талап еткен.
«Сот жазаны жеңілдететін мән-жай ретінде кінәсін мойындау, шын жүректен өкіну, тергеуге белсенді көмек көрсету, соттылығының жоқтығы және екі кішкентай баланың болуын ескерді», – деді соттың баспасөз қызмет өкілдері.
Еске салайық, оқиғадан кейін бірден полиция қызметкерлері денсаулыққа қасақана зиян келтіру дерегі бойынша соталды тергеуді бастап, кейін іс аса ауыр бапқа ауыстырылып, күдікті қамауға алынған болатын.
