Көктемгі дала жұмыстары қызу жүруде

Жамбыл облысында көктемгі дала жұмыстары басталды. Ағымдағы жылы өңірде ауыл шаруашылығы дақылдары 770,4 мың гектарға орналастырылады. Бұл өткен жылмен салыстырғанда 14,4 мың гектарға артық.

Нақтырақ айтқанда, 398,3 мың гектарға дәнді және дәнді бұршақты дақылдар, 72,1 мың гектарға майлы дақылдар, 44,8 мың гектарға көкөніс, 10,4 мың гектарға қант қызылшасы, 11,8 мың гектарға картоп, 16,8 мың гектарға бақша дақылдары және 216,2 мың гектарға мал азығы егілмек. Бүгінгі таңда облыс бойынша жоспардағы 104 мың гектар жердің 605 гектары жыртылған. Бұл туралы ауыл шаруашылығы басқармасының басшысы Нұрби Жігітеков атап өтті.
– Көктемгі дала жұмыстарына қажетті 95,6 мың тонна тұқымның 73,1 мың тоннасы дайындалды. Бұл қажетті тұқым көлемінің 76,4 пайызын құрайды. Ал жетіспейтін қант қызылшасы, дәндік жүгері, картоп, сүрлемдік жүгері мен күнбағыс дақылдарының тұқымын Алматы, Қарағанды, Павлодар және Жетісу облыстарынан және шет мемлекеттерден жеткізу көзделуде, – деді басқарма басшысы.
Сондай-ақ биылғы егіс жұмыстарына 6 883 дана ауыл шаруашылығы техникасы, яғни 4 529 трактор, 1 071 соқа, 746 дана дән сепкіш, 457 дана қопсытқыш, 80 дана тұқым дәрілегіш техникаларын жұмылдыру жоспарланған.
Жалпы көктемгі дала жұмыстарына қажетті дизель отыны 15,5 мың тоннаны құрайды. Оның 4,1 мың тоннасы облысқа жеткізіліп, 495 тоннасы шаруашылықтарға таратылды. Жанар-жағармай 204-214 теңге аралығында босатылуда.
Қазіргі кезде Байзақ және Жамбыл аудандарында егістік жұмыстары қызу жүруде.
Айталық, байзақтық «Нұрхан» шаруа қожалығының егіс алқа-бында жер жырту жұмыстары бір апта бұрын басталған. Шаруа қожалығының басшысы Қырықбай Рахымбердиев көктемгі егін егу жұмыстарын жүйелі жүзеге асырып, мол өнім алуға ниетті.
– 1995 жылдан бері шаруа қожалығының жұмыстарымен айналысамыз. Осы жылдар аралығында пияз, жоңышқа ектік. Соңғы екі-үш жыл көлеміндегі су мәселесіне байланысты арпа егуге көштік. Күн көзі жылыған сәттен үйдегі бала-шағамызбен бірге егіс алқабына шығып, тыным таппаймыз. Қазір 2 трактор жер жыртып жүр. Жергілікті билік тарапынан жеңілдетілген бағада дизель отыны берілетін болды, – деді қожалық басшысы Қ.Рахымбердиев.
Сондай-ақ Жамбыл ауданындағы «Тимофеев» шаруа қожалығы 500 гектар аумаққа жаздық арпаның «Космос» және «Бәйшешек» сорттарын себуді көздеп отырса, «Асқар» шаруа қожалығы 10 гектар алқапқа пияз егу жұмыстарын бастап кеткен.
«Қызыл Дихан» өндірістік кооперативінің 2 мың гектар алқабында да жер жырту ісі үздіксіз атқарылуда. Мұндағы 1 300 гектар жер суармалы десек, қалған аумаққа су үнемдеу технологияларын енгізу шаралары жүзеге асуда.

Жұмаш Жолболды