БАҚ-пен берік байланыс орнайды

Бүгін «ҚазТрансГаз Аймақ» АҚ Жамбыл өндірістік филиалы мен «Jambyl-Taraz» облыстық газеті арасында кездесу өтті. Басқосуда әуелі филиал директоры Бахтияр Көпбосынов сөз алып, атқарылған жұмыстар жөнінде баяндады.
– Жамбыл облысының 10 ауданының 9-ы газдандырылған. Осылайша бұл көрсеткіш 73 пайызды, тұрғындары саны бойынша 90,2 пайызды құрайды. Жыл соңына дейін тағы 7 елдімекенді газдандыру жоспарлануда. Сондай-ақ 2023-2024 жылдың жылу маусымына дайындалу бойынша ағымдағы жөндеу жұмыстары жүргізілуде. Сонымен қатар «Тараз қаласының газ желілерін жаңғырту» жобасы бойынша бүгінгі таңда 1-кезеңнің 5 қосу кешені, 2-кезеңнің 3-қосу кешені толығымен аяқталған. Осының арқасында 1039 шақырым полиэтилендік газ желілері қайта салынды, – деді Бахтияр Бейсембайұлы.
Келесі кезекте Саятхан Жапарұлы «Jambyl-Taraz» облыстық газетінің жұмысына тоқталып, басылымның алдағы уақытта өндірістік филиалмен берік байланыс орнатуға дайын екенін жеткізді. Филиал ұжымы да газетке жазылып, басылымға қолдау көрсететіндерін баса айтты.