Таразда 42 көше жөндеуден өтуде

Тараз қаласының әкімі Бақытжан Орынбековтің төрағалығымен кезекті аппарат кеңесі өтті. Жиында әуелі қала әкімдігі тұрғын-жай коммуналдық шаруашылық, жолаушылар көлігі және автомобиль жолдары бөлімі басшысының орынбасары Елдос Қыдырбекұлы шаһардағы жол жөндеу жұмыстары туралы баяндады.

– Бүгінде қалада 2026 жылға арналған жоспарға сәйкес жалпы ұзындығы 34,7 шақырымды құрайтын 42 көшеде орташа жөндеу жұмыстары жүргізілуде. Сонымен қатар «Арайстроймаркет-2003» ЖШС мердігерлігімен Рысбек батыр көшесінде және «Арайстрой-GROUP» ЖШС мердігерлігімен Қолбасшы Қойгелді көшесінде жүргізілген жөндеу жұмыстары толық аяқталды, – деген Е.Қыдырбекұлы күн тәртібіндегі келесі мәселе – жылыту маусымына дайындық барысына тоқталды.
Оның айтуынша, қалада 1 813 нысан орталықтандырылған жылу жүйесімен қамтылады. Аталған нысандарды жылумен қамтамасыз ету мақсатымен жылу өндіру, тасымалдаумен айналысатын 5 кәсіпорын және көгілдір отынмен қамтамасыз ететін «QAZAQGAZ AIMAQ» акционерлік қоғамының Жамбыл өндірістік филиалы қызмет атқаруда. Сонымен қатар шаһар аумағында жылу желілерін қайта жаңғырту бағытында 3 ауқымды жоба жүзеге асырылып жатыр екен. Жобалар аясындағы құрылыс және абаттандыру жұмыстарын 1 қазанға дейін толық аяқтау жоспарланған.
Бұдан бөлек, кеңесте су құбырларын ауыстыру, Қала күні мерекесіне орай өткізілетін іс-шаралар, 2026 жылдың қаңтар-тамыз айларының қорытындысымен Тараз қаласының әлеуметтік-экономикалық дамуы, шаһардағы көппәтерлі тұрғын үйлердің құрылысы секілді өзекті мәселелер қаралды.
Жиынды қорытындылаған Бақытжан Әмірбекұлы жауапты тұлғаларға нақты тапсырмалар жүктеді.

Құрмаш ҚАПТАҒАЙ