Қарулы Күштер – тәуелсіздігіміздің тірегі

Құрметті Тараз қаласының тұрғындары!
Баршаңызды Отан қорғаушы күнімен шын жүректен құттықтаймын! Бұл мерейлі мереке әрқайсысымыз үшін айрықша маңызға ие. Өйткені Отан қорғау – тек әскери міндет емес, әр азаматтың жүрегінде орныққан қасиетті парыз, халық алдындағы үлкен жауапкершілік екені белгілі.
Кешегі баһадүр бабаларымыз ақ найзаның ұшымен, ақ білектің күшімен байтақ жерімізді қорғап қалғаны тарихтан мәлім. Сол бір алмағайып замандарда ел үшін жанын қиған қаһармандарымыз- дың ерлігі мен қайсар рухынан тағылым алған бүгінгі сайыпқыран сарбаздарымыз әскеріміздің әлеуетін арттырып, тәуелсіздігіміздің тұғырын биіктетуде. Осының арқасында халқымыз еш алаңсыз бейбітшілік бесігінде тербеліп келеді.
Қазіргі таңда мемлекетіміздің қорғаныс қабілетін нығайту бас- ты міндеттердің біріне айналды. Бұл тұрғыда Мемлекет басшысы – Қарулы Күштердің Жоғарғы Бас қолбасшысы Қасым-Жомарт Тоқаевтың тапсырмасымен ауқымды жұмыстар атқарылып жатыр. Осының өзі ел қауіпсіздігіне ерекше екпін түсіріліп отырғанын айғақтайды.
Қадірлі жерлестер!
Егемен еліміздің тірегі – оның берік қорғаны мен бірлігі. Сондықтан әрбір азамат Отан алдындағы жауапкершілікті терең сезініп, ел игілігі жолында жұдырықтай жұмылып еңбек ете білсе, мемлекетіміздің келешегі кемел болары даусыз.
Бүгінгі мәні терең мерекеде баршаңызға зор денсаулық, қажымас қайрат, мол бақыт тілеймін! Еліміз аман, жұртымыз тыныш болып, әскеріміздің айбыны асқақтай берсін!

Бақытжан ОРЫНБЕКОВ,
Тараз қаласының әкімі