Жаңа қоғамдағы жастардың әлеуеті

Қазіргі таңда қоғамның дамуы мен мемлекеттің болашағы жастардың біліміне, белсенділігіне және азаматтық ұстанымына тікелей байланысты. Жастар – елдің қозғаушы күші, қоғамның жаңаруына серпін беретін басты әлеуметтік топ. Кез келген мемлекеттің өркендеуі мен тұрақты дамуы жас буынның рухани құндылықтарына, заманауи білім мен технологияны игеру деңгейіне және ел тағдырына деген жауапкершілігіне тәуелді. Сондықтан жаңа қоғамдағы жастардың әлеуетін арттыру – маңызды міндеттердің бірі.

Тәуелсіз Қазақстанның қалыптасу кезеңінде жастар саясатына ерекше көңіл бөлініп келеді. Мемлекет тарапынан білім беру, жұмыспен қамту, кәсіпкерлікті дамыту, шығармашылық пен спортты қолдау бағытында көптеген бағдарламалар жүзеге асырылуда. Бұл бастамалар жастардың өз қабілеттерін толық ашуына, қоғам өміріне белсенді араласуына мүмкіндік береді. Себебі бүгінгі жас – ертеңгі ел тізгінін ұстайтын тұлға.
Жаңа қоғамдағы жастардың басты ерекшелігі – олардың заман талабына тез бейімделуі. Қазіргі жастар ақпараттық технологияларды жетік меңгерген, әлемдік өзгерістерге бейжай қарамайтын, жаңашылдыққа ұмтылатын буын ретінде қалыптасып келеді. Сандық технологиялардың дамуы жастарға білім мен ақпаратқа кең жол ашты. Бүгінде жас буын әлемнің кез келген нүктесіндегі жаңалықтарды еркін меңгеріп, түрлі жобаларға қатысып, өз идеяларын жүзеге асыруға мүмкіндік алуда. Бұл – жастар әлеуетінің артып келе жатқанын көрсететін маңызды фактор.
Сонымен қатар жастардың қоғамдық белсенділігі де ерекше маңызға ие. Еріктілік қызметі, экологиялық бастамалар, қайырымдылық акциялары мен қоғамдық ұйымдардағы жұмыстар жастардың елге деген жанашырлығын арттырады. Қоғам мәселелеріне бейжай қарамайтын, өз ортасына пайдасын тигізуге ұмтылатын жастар – мемлекеттің үлкен байлығы. Соңғы жылдары елімізде волонтерлік қозғалыстың қарқынды дамуы да жастардың әлеуметтік жауапкершілігінің жоғары екенін дәлелдейді.
Жастардың әлеуеті тек біліммен ғана емес, рухани құндылықтармен де өлшенеді. Ұлттық мәдениет пен дәстүрді құрметтейтін, ана тілін ардақтайтын, тарихын білетін жас ұрпақ – ел болашағының кепілі. Жаһандану дәуірінде ұлттық болмысты сақтай отырып, әлемдік өркениетке қадам басу маңызды. Осы тұрғыда жастардың бойында патриоттық сезімді қалыптастыру, ұлттық құндылықтарды дәріптеу – қоғам алдындағы маңызды міндеттердің бірі.
Қазіргі жастар кәсіпкерлік саласына да белсенді араласуда. Жаңа идея ұсынып, тың жобаларды жүзеге асырып жүрген жас кәсіпкерлердің қатары көбейіп келеді. Бұл ел экономикасының дамуына оң әсерін тигізеді. Мемлекет тарапынан көрсетіліп жатқан қолдау жастардың өз кәсібін бастауына, жаңа жұмыс орындарын ашуына жол ашуда. Еңбекқор, білімді әрі талапты жастар кез келген салада табысқа жете алатынын дәлелдеп отыр.
Дегенмен, жастар тәрбиесіне қатысты мәселелер де назардан тыс қалмауға тиіс. Қоғамда түрлі жат ағымдар, интернет тәуелділігі, құқық бұзушылық пен зиянды әрекеттер жастардың санасына теріс әсер етуі мүмкін. Сондықтан отбасы, мектеп және қоғам бірлесе отырып, жастарға дұрыс бағыт-бағдар беруі қажет. Себебі саналы, тәрбиелі әрі білімді ұрпақ қана мемлекеттің дамуына үлес қоса алады.
Қорытындылай келе, жаңа қоғамдағы жастардың әлеуеті – ел дамуының басты кепілі. Білімді, белсенді, отансүйгіш әрі жаңашыл жастар қоғамның барлық саласында маңызды рөл атқарады. Олардың шығармашылығын қолдап, сапалы білім мен тәрбие беру – болашаққа салынған инвестиция. Жастарға мүмкіндік беру арқылы мемлекет өзінің жарқын келешегін қалыптастырады. Сондықтан жастардың әлеуетін арттыру – қоғамның ортақ міндеті әрі ел болашағына жасалған сенімді қадам.

Азамат ЛЕСБЕК,
Тараз қаласы әкімдігі ішкі саясат бөлімінің
«Жастар ресурстық орталығы» КММ директоры