Жол ережесін 55 рет бұзған жүргізуші құрықталды

Облыс орталығының аумағын патрульдеу кезінде полиция қызметкерлері «Қорғау» жүйесінің көмегімен іздеудегі көк түсті «Hyundai Elantra» автокөлігін анықтады.

Аталған көлік құралының жүргізушісі жол ережесін қасақана бұзушы болып табылады және айыппұлдары бойынша үлкен берешегі бар.
Бұл автокөлікке 55 рет жол қозғалысы ережесін бұзғаны үшін 1 миллион 696 706 теңге көлемінде айыппұл салынған. Оның басым бөлігі жылдамдық режимін бұзғаны үшін берілген.
Автокөлік арнайы айып тұрағына қойылды.
«Қорғау» мобильді қосымшасы жол қозғалысын автоматты қадағалау тиімділігін арттыру үшін енгізілді. Онда Ішкі істер министрлігінің аппараттық-бағдарламалық кешендері, мобильді қосымшалары біріктірілген, олардан мәліметтер полиция қызметкерлерінің планшеттеріне түседі.
Бұл нақты уақыт режимінде сақтандыру полисінсіз пайдаланылатын жалған мемлекеттік тіркеу нөмірлері бар, бағыттама бойынша іздестірілгендер, соның ішінде айыппұл бойынша берешегі бар жол ережесін қасақана бұзушыларды анықтауға мүмкіндік береді.

Еркін САЙЫН