Жамбыл облысында көктемгі егіс науқанына дайындық күшейді

Егіс құрылымы биыл стратегиялық тұрғыда қайта қаралды: ылғалды көп қажет ететін дақылдар азайтылып, әртараптандыруға басымдық берілді. Бидай 145,1 мың гектарға, арпа 187,8 мың гектарға, жүгері 23,3 мың гектарға егілмек. Майлы дақылдар 40 мың гектарды, ал мал азығы дақылдары 185 мың гектарды қамтиды.

Суару жүйесін жақсарту мақсатында Ислам даму банкінің қаржыландыруымен облыстағы 76 канал жөнделіп жатыр. Жалпы ұзындығы 430 шақырымнан асатын гидроқұрылымдар жаңартылып, 51,4 мың гектар суармалы алқап қамтылады. Бұл болашақта ауыл шаруашылығы өндірісінің тұрақтылығын арттыруға мүмкіндік береді.

Көктемгі жұмыстарға 10,5 мыңнан астам техника қатысады. Сонымен қатар, техника паркін жаңарту жалғасып, биыл 476 жаңа ауыл шаруашылығы техникасын алу жоспарланған.

Минералды тыңайтқыш енгізу көлемі де ұлғайтылмақ –  478,2 мың гектарға 109,7 мың тонна тыңайтқыш себіледі. Қаржылық қолдау «Кең дала-2» бағдарламасы арқылы жүзеге асып жатыр: шаруалардан 4,6 млрд теңге өтініш түсіп, оның 2,5 млрд теңгесі жеңілдетілген несие ретінде берілді.

Жалпы алғанда, атқарылып жатқан жұмыстар өңірдегі аграрлық саланың тұрақты дамуына және алдағы егіс науқанының тиімді өтуіне негіз қалайды.