Жамбыл ауданында «Pfizer» екпесінің 30 дозасы салынды

  Жамбыл аудандық орталық ауруханасының бас дәрігері Алтай Сауруковтың айтуынша, өңірге өткен аптада жеткізілген 30 доза «Pfizer» вакцинасының бүгінде 27-сі балаларға, 1-уі бала күтіміндегі, 2-уі жүкті әйелдерге салынған,–деп хабарлайды «Jambyl-Taraz» ақпарат агенттігі.

Аудандық емханаға арнайы келген бала күтіміндегі Жұмакүл Мырзай екпені баланың денсаулығы мен болашағы үшін қабылдағанын айтады.
«Әр отбасының алтын қазығы – бала. Оның денсаулығына ата-ана тікелей жауапты. Бүгін емханаға келіп, дәрігерлердің нұсқаулығын тыңдап, вакцина қабылдадым. Екпені көптен бері күтіп жүрген едім. Барлықтарыңызды екпе алуға шақырамын», – дейді ол.

Жамбыл аудандық орталық ауруханасының иммунолог дәрігері Жадраш Тотаева бұл вакцинаның қауіпсіздігі мен тиімділігі басқа екпелерге қарағанда жоғары екенін жеткізді. Екпе 12-17 жас аралығындағы жасөспірімдерге, 16-37 апталық жүкті әйелдерге және 42 күннен асқан емізулі аналарға салынуда. Екпеден өткеннен кейін 30 минут дәрігерлердің бақылауында болады.