«Тифломузей» жобасы аясында арнайы бұрыш ашылды

Жамбыл облыстық көзі көрмейтін және әлсіз көретін азаматтар кітапханасының ұйымдастыруымен Жамбыл аудандық тарихи-өлкетану музейінде «Тифло-музей» жобасы аясында «Қолыңмен ұстап, жүрекпен сезін!» атты арнайы бұрыш ашылды.
Халқымыздың ұлттық тарихи-мәдени жәдігерлерін зағип жандардың құлақпен естіген мағлұматты қолмен ұстап сезінуге, ой өрісін дамытуға жол ашу, сонымен қатар музей экспозициясына еркін қол жеткізуге жағдай жасауға мүмкіндік беру мақсатында жасақталған арнайы бұрышта QR-код 21 жәдігерге қойылды.
Жобаның салтанатты рәсімін журналистер одағының ардагері М.С.Бертайұлы мен ардагерлер кеңесінің төрағасы С.Б.Уалиұлы ашып, көрмеге келген Жамбыл аудандық орталықтандырылған кітапханалар жүйесінің басшысы, Жамбыл аудандық «Соқырлар қоғамы» өкілдері, арнаулы кітапхана оқырмандары, музей қызметкерлері атсалысып, зағип оқырмандар өз кезегінде арнайы кітапханаға алғыстарын білдіріп, жұмыстарына толағай табыстар тіледі.

Лаура Самбетова,
Жамбыл облыстық көзі көрмейтін және
әлсіз көретін азаматтар кітапханасының
зағип оқырмандармен жұмыс
бөлімінің кітапханашысы