Тұрғындар тілегі ескерусіз қалмайды

Тараз қалалық мәслихатының төрағасы Кенжебек Олжабай №17 сайлау округі тұрғындарының алдында өткен жылды қорытындылап, жыл ішінде атқарылған жұмыстар туралы баяндады.

Кездесуге «Әулиеата» ауданы әкімінің міндетін атқарушы Медет Нұрмаханов, бірқатар мекеме және қала әкімдігінің бөлім басшылары, учаскелік полиция қызметкерлері және аумақтық округ тұрғындары қатысты.
Халық қалаулысы әуелі Бас жоспар аясында 14 елді мекен мен 2 саяжайдың қаламызға қосылып, шаһар аумағының «Әулиеата» және «Жібек жолы» аудандарына бөлінгенін атап өтті. Сондай-ақ аумақтық округ тұрғындарына «Әулиеата» ауданы әкімінің міндетін атқарушы Медет Нұрмахановты таныстырып, қалалық мәслихаттың атқарған жұмыстарынан бөлек, тұрғындар тарапынан түскен мәселелердің мән-жайына тоқталды.
– Округ бойынша тұрғын үй-коммуналдық шаруашылық саласында да көптеген жұмыстар атқарылды. Мәселен, Ы.Сүлейменов көшесінің соңындағы көпірді жөндеу және көпірге дейінгі түнгі жарық шамдарын орнату, Рысбек батыр көшесін кеңейту, №7 мектептің жапсарлас ғимаратының құрылысы және №32 мектептің ауласына балалар спорт алаңшасын салу сынды түйіні шешілмеген түйткілді мәселелер кезең-кезеңімен шешімін тауып келеді. Мұның бәрі де атқарылған жұмыстардың бір сыпырасы ғана, – деді Кенжебек Мамашбайұлы.
Келесі кезекте тұрғындар жол жөндеу, талдарды кесу, ауызсу жүргізу, спорт және шығармашылық үйірмелерге балалардың тегін қатысуы, қаламыздың тазалығы туралы өзекті мәселелерді көтерді. Төраға барлық сұрақтарға нақты жауаптар қайтарып, айтылған барша ұсыныс-пікірлердің назардан тыс қалмайтынын жеткізді.

Білгетай ТАЛАС,
журналист