Мектеп формасына бөлінетін ақшаны қалай алу керек?
Биылдан бастап оқушыларға мектеп формасын беру тәртібіне өзгеріс енгізілді. Бұдан былай бірнеше санатқа кіретін балаларға мектеп формасы мен оқуға қажетті заттар берілмейді деп хабарлады turkystan.kz Sputnik Қазақстан-ға сілтеме жасап.
Оның ақшасы тікелей ата-анасының есепшотына аударылады. Оған қоса, материалдық көмектің көлемі ұлғайтылды. тегін мектеп формасын алу тәртібін ұсынады.
475 мың балаға ақша аударылады Бұған дейін балаларға таратылатын мектеп формасын әкімдіктер сатып алып, білім беру мекемелеріне үлестіріп отырған. Бірақ жыл сайын киімнің өлшеміне және сапасына қатысты арыз-шағымдар көп түсті.
Осыған байланысты биыл үкіметтің арнайы қаулысына өзгеріс енгізіліп, мектеп формасының ақшасын ата-ананың немесе кәмелетке толған білім алушының өтініші бойынша тікелей өзіне аударуға шешім қабыланды. Материалдық көмектің көлемі ең төменгі күнкөріс деңгейінен, яғни, 37 389 теңгеден кем болмауы тиіс.
Балалардың құқықтарын қорғау комитетінің төрағасы Дулат Жекебаевтің айтуынша, материалдық көмек 37 мыңнан жоғары болуы мүмкін. Бірақ одан төмен түспеуі шарт.
«Кей аймақтар бұл сомадан артық бөліп жатыр, мысалы, Алматы 43 мың теңгеден беріп жатыр», – дейді Жекебаев.
Оқу-ағарту министрлігінің мәліметіне сәйкес, материалдық көмек 475 мыңнан астам балаға беріледі. 20 тамызға дейін мектеп формасына қажетті ақшаның барлығы аударылады.
Ақша бір балаға ғана беріле ме?
Бұған дейін әлеуметтік желіде «Жалпыға міндетті білім беру» бағдарламасы бойынша бір үйден тек бір балаға материалдық көмек көрсетілетіні туралы ақпарат тараған болатын. Бірақ оқу-ағарту министрлігі оны жоққа шығарды.
«Қолданыстағы заңнамаға сәйкес, әлеуметтік осал топқа жататын отбасылар «Жалпыға міндетті білім беру» қоры арқылы әрбір балаға көмек алуы керек», – дейді министрлік мамандары.
Ал оқу-ағарту министрі Асхат Аймағамбетов өз баласына мектеп формасына қанша ақша жұмсағанын айтты. Оның мектепке баратын бір баласы бар екен.
«Осы демалыста баламды ертіп, дүкенге бардым. Дүкеннен бірнеше ақ жейде, шалбар, костюм, галстук алдық. Бағасына келсек, 35 мың теңгедей ақша кетті. Шалбарын, костюмін, көйлегін алдым», – дейді министр.
Материалдық көмек кімге аударылады?
Үкімет қаулысына сәйкес, материалдық көмек нақты бірнеше санатқа ғана беріледі.
Олар:
атаулы әлеуметтік көмек алуға құқығы бар отбасылардан шыққан балалар;
атаулы әлеуметтік көмек алмайтын, жан басына шаққандағы табысы ең төменгі күнкөріс деңгейінен төмен отбасылардан шыққан балалар;
отбасыларда тұратын жетім балалар және ата-анасының қамқорлығынсыз қалған балалар;
төтенше жағдайлардың салдарынан шұғыл жәрдемді талап ететін отбасылардан шыққан балалар;
басқа санаттар (қиын жағдайға тап болған отбасылар, оның ішінде мүгедек балалары бар);
Құжаттар қайда тапсырылады
Материалдық көмекті алу үшін алдымен өтініш жазу керек. Оны мектепке тапсырады. Одан кейін несиелік қарызы жоқ және бұғатталмаған банктік карточканың 20 таңбалы нөмірін ұсынады, я болмаса, материалдық көмекті аудару үшін банкте арнайы шот ашуы қажет.
Талапқа сәйкес, қаражатты мақсатты пайдаланылу құжатпен растаталады. Ол үшін мектеп формасы сатып алынған күннен бастап 15 жұмыс күні ішінде түбіртек пен фотоны білім беру ұйымына тапсыру керек.
«Мектепке жол» акциясы
Бүгінде «Мектепке жол» республикалық акциясы аясында әлеуметтік осал топтардың балаларына оқуға қажетті заттар да таратылады.
Шараға мемлекеттік органдар, меценаттарды, демеушілер мен үкіметтік емес ұйымдар атсалысып, материалдық көмек жасайды.
Мәселен, астанада 2022-2023 оқу жылында аудан әкімдіктерімен бірлесіп демеушілік қаражат есебінен керек-жарақтары бар мектеп рюкзактарын 10 мыңға жуық балаға тарату жоспарланып отыр. Тура сондай шаралар басқа өңірлерде атқарылады.
