«Өлең деп өмір сүремін»
Тараз қаласындағы «Достық үйінде» Қазақстан Журналистер одағының мүшесі, айтыскер ақын Есет Досалының «Өлең деп өмір сүремін» атты жыр жинағының аудио үнтаспасы мен нүктелі-бедерлі Брайль қарпіндегі нұсқасының тұсаукесері өтті.
«Əулиеата – кітап оқитын өңір» жобасы аясындағы шараны Жамбыл облыстық көзі көрмейтін жəне əлсіз көретін азаматтар кітапханасы мен облыстық айтыскер ақындар, жыршы-термешілер орталығы ұйымдастырды. Рухани құндылықтар тамырын жас жеткіншек санасына жеткізу, ұлтымыздың руханият дарабоздарының төл туындыларын насихаттау мақсатында өткен əдеби кештің шымылдығы ақынның өлеңдерінен құралған қойылымымен түрілді.
Келесі кезекте белгілі қаламгер, журналист Марат Құлибаев қаламдасын жаңа кітабының жарық көруімен құттықтап, ізгі тілегін жеткізді.
– Есет Досалының өлеңдерінің ерекшелігі – өлең құрылымдары жеңіл, балалар шығармашылығына жақын. Сондықтан Есет балалар əдебиетіне қалам тербесе, үлкен жазушы шығады деп сенемін. Тағы бір ерекше қасиеті, ол – арнау жазу, яғни адам бойындағы қасиеттерді бірден байқай алатын қабілетке ие қаламгер, – деді Марат Құлибайұлы.
Сөз арасында кеш иесі өзінің өнер мен өмірдегі аға буын өкілдері мен қазіргі таңда өзіне ізбасар болып жүрген шəкірттері жайлы ой-пікірін ортаға салды. Сондай-ақ өнерге алғаш қадам басқан сəтінен бастап өткен күнге
көз жүгіртіп, өз естеліктерін бөлісті.
Əдеби шара «Ақынға 100 сұрақ» форматында жалғасып, зиялы қауым өкілдері, жергілікті қаламгерлер, əріптестері мен оқырмандар түрлі сауалдарын қою арқылы қаламгерімізді жан-жақты қырынан тануға мүмкіндік алды. Өз кезегінде Есет Жаңабайұлы төл туындыларын кеш қонақтарына табыстап, кештің мерейін асырған көрермен қауымға шынайы алғысын білдірді.
