«Көп адам өз мүддесін қорғауды білмейді». Президент құқықтық сауат мәселесін көтерді

Мемлекет басшысы Қасым-Жомарт Тоқаев адам құқықтарын қорғау жүйесі өкілдерімен кездесуде қазақстандықтардың құқықтың сауаты мәселесін көтерді, – деп хабарлайды «Jambyl-Taraz» ақпараттық агенттігі  Massaget.kz сайтына сілтеме жасап.

«Азаматтардың құқықтық сауаттылығын арттыру және құқық қорғау институттарының жұмысы туралы ақпараттандыру мәселесін арттыру қажет. Қазіргі жағдайда құқықтық насихат пен азаматтарды құқықтық тұрғыда тәрбиелеудің маңызы арта түсті. Бұл іске сарапшыларды тарта отырып, барлық құқық қорғау институтының әлеуетін жұмылдыру қажет.

Сіздер үнемі қоғамдағы маңызды мәселелерді көтерулеріңіз керек. Көп жағдайда әлеуметтік шиеленіс пен масылдыққа құқықтық сауатсыздық себеп болады. Көптеген адам құқықтық тұрғыда өз мүдделерін қорғауды, қолданыстағы заң нормаларына сүйенуді білмейді. Азаматтардың құқықтары мен бостандықтары көбіне ақпараттық ресурстар мен заң көмегі қолжетімсіз шалғай аймақтарда бұзылады», – деді Президент.