Ербол Қарашөкеев Тараз қаласының сәулеттік келбетін жақсарту тұжырымдамасын әзірлеуді тапсырды

Жамбыл облысының әкімі Ербол Қарашөкеевтің төрағалығымен Тараз қаласын дамыту мәселелеріне арналған жиын өтті.

Қала әкімі Бақытжан Орынбеков өз баяндамасында бірқатар өзекті мәселеге тоқталып, жайлы орта қалыптастыру бағытындағы жұмыстарды баяндады.

Қаланы ауызсумен қамту көрсеткіші 92 пайызды құрайды. Биыл 28 саяжай учаскесін сумен қамту жобасы жүзеге асырылып жатыр.

Таразда 1455 көше бар, оның ішінде 838-і асфальтталған, ал 607 көшенікі топырақты жол. Бүгінгі таңда 240 көшені жөндеу жұмыстары басталды.

Облыс орталығында барлығы тоғыз тасымалдаушы компания бар, 36 бағыт бойынша 400 автобус жүреді. Жыл соңына дейін 50 автобус сатып алу жоспарланып отыр. Қала маңындағы аудандар мен аудандарды қоғамдық көлікпен толық қамтамасыз ету үшін тағы 12 бағыт қосу қажет.

Жиын барысында облыс орталығының сәулеттік келбетін жақсарту және абаттандыру мәселелері де сөз болды.

– Жүйелілік пен біртұтас көзқарас – бұлар облыс орталығының сәулеттік келбетін жақсарту жұмыстарын жүргізу кезінде басшылыққа алынуы тиіс критерийлер. Қала заманауи, жайлы, қауіпсіз болуы керек. Ал бұндай істі жаңа, креативті идеяларсыз атқару мүмкін емес. Бірақ, мұндағы біздің басты міндетіміз – Тараздың тарихи келбетін сақтау. Жаңа сәулеттік шешімдерді пайдалана отырып, Тараздың бірегей сәулеттік келбетін қалыптастырудың бірыңғай тұжырымдамасын әзірлеу қажет, – деп тапсырды облыс әкімі.

Аймақ басшысы балалардың қауіпсіздігін қамтамасыз ету шараларын қадағалаудың маңыздылығына да тоқталды. Қала басшылығына аудандардағы барлық ойын алаңдарын ретке келтіру тапсырылды.