«Дүрбелең басталды». Музыка фестивалінде сегіз адам қаза болды

Өрт сөндірушілері Хьюстонда (Техас штаты) өткен Astroworld Festival кезінде кем дегенде 8 адам қаза тауып, ондаған адам жарақат алғанын растады, – деп хабарлайды «Jambyl-Taraz» ақпарат агенттігі Tengrinews.kz сайтына сілтеме жасап.

«Кем дегенде 8 адамның қаза тапқаны расталды, ондаған адам жарақат алды… Фестивальге 50 мыңға жуық адам жиналған… 17 адам ауруханаға жатқызылды… Олардың 11-інде жүрек соғысы нашарлаған», – деді өрт қызметінің бастығы Facebook-те жарияланған полициямен бірлескен баспасөз мәслихатында.

Өлім себебі әлі белгісіз. Жұмада жергілікті уақыт бойынша кешкі сағат 21.00-21.15 шамасында жиналған жұрт сахнаға қарай жинала бастаған, салдарынан дүрбелең басталып, адамдар есінен танып қалған. 300-ден аса адамға оқиға орнында медициналық көмек көрсетілген. Ауруханаға түскендердің арасында 10 жастағы балалар да бар.

Astroworld Festival – америкалық рэпер Травис Скотт ұйымдастырған Хьюстон қаласында өтетін жыл сайынғы музыка фестивалі. Бірінші фестиваль 2018 жылы өткен. Биыл фестиваль 5-6 қарашаға жоспарланған, бірақ қайғылы оқиғадан кейін шараның екінші күні өткізілмей қалды.