Балалар қауіпсіздігі – басты назарда

Апат айтып келмейді, өрт ойламаған жерден тұтанады. Мұндай жағдай көбінде балалар бар жерде орын алып жатады. Қайғылы оқиғаларды болдырмау мақсатында тараздық төтеншеліктер түрлі іс-шаралар ұйымдастырып, оқу-жаттығулар өткізіп, сала мамандары шаһар тұрғындарына күнделікті өмірдегі өрт қауіпсіздігі ережелерін түсіндіріп келеді.

Осыған орай күні кеше өрт сөндірушілердің кәсіби дағдыларын жетілдіру және тиісті қызметтердің өрт туындаған жағдайда жедел әрекет ету бойынша өзара байланысын дамытуы үшін облыстық ТЖД Өрт сөндіру және авариялық-құтқару жұмыстары қызметінің ұйымдастыруымен Тараз қаласындағы «Mynbala» ойын-сауық орталығында өрт-тактикалық оқу-жаттығуы өтты.
Шартты түрде белгіленген өрт оқиғасы балалар ойнайтын залдағы электр сымдарының қысқа тұйықталуынан туындаған. Өрт сөндірушілер келіп жеткенге дейін аталған ойын-сауық орталығының персоналы өрт сөндіргіш пен өрт сөндіру кранын қолдану арқылы алғашқы өрт сөндіру жұмыстарын жүргізіп, адамдарды қауіпсіз орынға шығарған. Содан соң Тараз қалалық өртке қарсы қызмет гарнизонының өрт сөндіруші-құтқарушылары шартты өртті жедел түрде сөндіру жұмыстарына кірісті. Оқиға орнында өрт сөндіру штабы және 2 өрт сөндіру учаскесі құрылды. Сондай-ақ 5 газ-түтіннен қорғау буыны жұмыс атқарды. Шартты өртке жедел-құтқару жасағы мен апаттар медицинасы орталығы, жедел жәрдем қызметі мен полиция қызметкерлері жұмылдырылды. Аталған оқу-жаттығуға барлығы 45 адам және 15 бірлік техника қатысты. Құтқарушылардың кәсіби жұмыстарының нәтижесінде ауданы 200 шаршы метрді қамтитын шартты өрт жойылды.
Өз кезегінде сала мамандары шаһар тұрғындарына өрттің басталғанын анықтаған сәтте сабырлы болу керектігін және «101» нөміріне қоңырау шалып, өрт сөндіру қызметіне хабарласуды ескертті. Өрт туралы толық және дұрыс ақпарат беру өрт сөндірушіге ықтимал жағдайды алдын ала болжауға және тиісті шешім қабылдауға, аз уақыт ішінде өртті жоюға күш пен құралдарды жұмылдыруға мүмкіндік беретінін есте сақтау қажет.

Жұмаш ЖОЛБОЛДЫ