Автобус және таксимен жүретіндер азайды

2021 жылдың қаңтар-қазан аралығында автокөлік және қалалық электр көлігі тасымалының табысы былтырғыдан 24,1% көбейіп 247 млрд теңгеге жетті, – деп хабарлайды «Jambyl-Taraz” ақпарат агенттігі naryk.kz сайтына сілтеме жасап. 

Соның ішінде басым бөлігі, яғни 171,4 млрд теңге жүк тасымалына тиесілі. Бұл сегмент былтырғыдан 18,2% өскен.

Автобуспен жолаушылар тасымалы 66,3 млрд теңге, такси қызметі 3,5 млрд теңге, трамвай мен троллейбус табысы 1,4 млрд теңгеден келді.

Жыл басынан бергі тоғыз айда жолаушылар тасымалы 24,9% азайып 5,7 млрд адамды құрады. Салыстыру үшін айта кетейік, 2020 жылдың алғашқы тоғыз айында көрсеткіш 7,6 млрд адамды құраған еді. Алдыңғы жылғыдан 61,1% аз. Оның алдында 2014-2019 жылдар аралығында көрсеткіш тұрақты көбейіп отырды.

Жолаушылар айналымы да екінші жыл қатарынан төмендеуде. Биыл жолаушылар айналымы 61 млрд, былтырғыдан 26,4% аз.

Жүк тасымалы да екінші жыл қатарынан төмендеуде.

2021 жылдың тоғыз айында 2,6 млрд тонна жүк тасымалданды. Былтырғыдан 2,4% аз. 2020 жылдың қаңтар-қазан аралығында жүк айналымы алдыңғы жылдағыдан 7,9% азайып 2,7 млрд тонна болды.

Биыл жүк айналымы 3,3%, азайды.

Такси бағасы Түркістан облысында 28,2%, Қостанай облысында 17,3%, Маңғыстау облысында 13,4% қымбаттады.