Алматы облысында ауылдардың бірінде 32 педагог 50 баланы оқытып келген

Алматы облысы Ұйғыр ауданындағы ауылдардың бірінде 32 педагог 50 баланы оқытып келген, деп хабарлайды Stan.kz ақпарат агенттігі.

Облыстық әкімдіктің хабарлауынша,  жаңа оқу жылының басталуы қарсаңында облыс әкімі Сүмбе ауылының орта мектебіне барды. Білім беру мекемесінің ғимараты 1976 жылы салынған, заманауи жөндеуден өткен. Алайда, бүгінгі таңда 750 оқушыға есептелген білім мекемесінде бар-жоғы 348 оқушы оқиды.

Білім басқармасының басшысы Салтанат Беспаева атап өткендей, мектепте балаларды оқыту және жан-жақты дамыту үшін барлық жағдай жасалған. Мұнда жабдықталған стоматология кабинеті бар, сонымен қатар негізгі спорт залынан басқа көптеген тренажерлері бар фитнес-орталық, бокс залы жабдықталған. Осыған орай, облыстың бас педагогы аталған ауылдық округтегі басқа мектептердің жағдайын атап өтті.

«Бірлік Сүмбе мектебінде 125 бала оқиды. Жаңасай негізгі мектебінде 50 оқушыны 32 адамнан тұратын ұжым оқытады. Екі мектеп те жөндеуді қажет етеді, екіншісі 1956 жылы салынған»,- деп атап өтті Салтанат Беспаева.

Облыс әкімі Марат Сұлтанғазиев балаларды екі мекемеден Сүмбе мектебіне ауыстыруды және оларды тасымалдап оқуын қамтамасыз етуді тапсырды. Босаған үй-жайларды қосымша білім беру мектебі ретінде пайдалану ұсынылды. Сонымен қатар, облыс әкімі жабылып жатқан мектеп педагогтарын жұмыссыз қалдырмай, ауданның басқа білім беру мекемелеріне орналастыруды тапсырды.