«Сыңғырла, сырлы қоңырау!»

Кеше Білім күніне орай №67 орта мектепте «Сыңғырла, сырлы қоңырау!» атты мерекелік шара өтті. Салтанатты жиынға Тараз қаласының әкімі Бақытжан Орынбеков қатысып, ізгі тілегін жеткізді.

– Білім күні – әр отбасы үшін ерекше қуанышты, ал ұстаздар мен оқушылар үшін жаңа оқу жылына бастар маңызды мереке. Әсіресе, мектеп табалдырығын алғаш аттаған бүлдіршіндер үшін бүгінгі күн – жаңа әрі жарқын кезең.
Биыл шаһарымызда 98 мыңнан аса оқушы жаңа оқу жылын бастаса, оның ішінде 8 789 бүлдіршін мектеп табалдырығын алғаш рет аттап отыр. Өткен оқу жылы қала мектептері үшін толайым табыс- тарға толы болды. Көптеген оқушы халықаралық, республикалық білім бәсекесінде жеңімпаз атанып, жүлделі орындарға қол жеткізді. Сондай-ақ бірқатар мектепте орын тапшылығы мен оқу кабинеттерінің жетіспеушілігі толық шешімін тапты. Атап айтқанда, №27 орта мектептің жанынан 600 орынды жаңа ғимарат салынса, №54 орта мектеп заманауи үлгіде қайта жөндеуден өткізілді. Нәтижесінде шаһар аумағында соңғы үш жылда 7 жаңа мектеп, 2 жапсарлас ғимарат пайдалануға берілді. Осы ретте Мемлекет басшысының тапсырмасымен бастау алған «Келешек мектептері» жобасы аясында бой көтерген 4 білім ордасын айрықша атап өткеніміз абзал. Бұл бағыттағы жұмыстарды әрі қарай жалғастыру мақсатында келер жылға қаржы мүмкіндіктерін қарастырып, тағы 7 мектепке күрделі жөндеу жұмыстарын жүргізу жоспарланып отыр, – деді Бақытжан Әмірбекұлы.
Мерекелік шараны өнерпаз өрендер концерттік бағдарламамен айшықтап, көпшілікке көтеріңкі көңіл күй сыйлады. Шара соңында шаһар басшысы білім ордасын аралап, жаңа оқу жылына табыс тіледі.

Құрмаш ҚАПТАҒАЙ