Тоқаев: Алтын Орда дәуірі – отандық тарихтың ажырамас бөлігі және ауқымды өркениеттік құбылыс

Қасым-Жомарт Тоқаев Алтын Орда тарихына арналған халықаралық симпозиумда сөйлеген сөзінде бұл кезеңнің Қазақстан тарихындағы орны ерекше екенін атап өтті. Мемлекет басшысының айтуынша, Алтын Орда дәуірі – отандық тарихтың маңызды бөлігі ғана емес, сонымен бірге бүкіл Еуразия өркениетінің дамуына ықпал еткен ауқымды тарихи құбылыс.

Президент көптеген халықтардың тарихи жадында реформаторлар мен ойшылдардың еңбегінен гөрі, билеушілердің жорықтары мен қолбасшылардың ерліктері көбірек сақталатынын айтты. Оның пікірінше, соғыстардағы жеңістер халықтың рухын көтергенімен, мемлекеттің ұзақ мерзімді дамуына әсер еткен институционалдық жаңашылдықтар мен тың идеялар көбіне назардан тыс қалып жатады.

Қасым-Жомарт Тоқаев Алтын Орда тарихын тек әскери жорықтар мен шайқастар арқылы бағалау оның шынайы мәнін толық ашпайтынын айтты. Мұндай көзқарас Ұлы даланың күрделі қоғамдық құрылымын, саяси жүйесін және мәдени дамуын көлеңкеде қалдырады.

Мемлекет басшысы қазіргі ғылымның пәнаралық мүмкіндіктері Алтын Орда тарихын объективті әрі жан-жақты зерттеуге жол ашатынын атап өтті. Оның айтуынша, археология, антропология, генетика, деректану және цифрлық технологиялар бұл дәуірді тереңірек тануға мүмкіндік береді.

Президент симпозиумға әлемнің әр елінен келген беделді ғалымдар қатысып отырғанын айтып, олардың зерттеулері Алтын Орда тарихын жаңа қырынан пайымдауға ықпал ететініне сенім білдірді.

Қасым-Жомарт Тоқаевтың пікірінше, Алтын Орда мұрасын кең өркениеттік тұрғыдан қарастыру – Қазақстанның тарихи санасын жаңғыртып қана қоймай, адамзат тарихындағы Ұлы даланың рөлін объективті бағалауға мүмкіндік береді.