«Әйелдерге кеңес беру» бөлімшесі ашылды
Еліміздің барлық өңірінде амбулаториялық деңгейде қызмет көрсететін «Әйелдер консультациясы» бөлімшелері қайта ашылып, олар бірқатар жаңа бағыттағы қызметтерді көрсете бастаған болатын.
Осыған орай, Тараз қаласында әйелдердің денсаулығын қорғауға бағытталған маңызды медициналық нысан – жаңартылған әйелдер консультациясы бөлімшесі өз есігін айқара ашты.
Аталған бөлімнің салтанатты ашылу рәсіміне облыстық денсаулық сақтау басқармасының басшысы Сержан Назарбек қатысып, жаңа орталықтың маңыздылығын атап өтті.
– Бұл орталықтың ашылуы – әйелдердің денсаулығына деген қамқорлықтың нақты көрінісі. Болашақ аналарға көрсетілетін медициналық көмектің сапасы мен қолжетімділігін арттыру арқылы біз ұлт саулығының негізін қалыптастырамыз, – деді басқарма басшысы.
Жаңа бөлімше «Almaz Medical Group» жауапкершілігі шектеулі серіктестігі емханасының жанынан ашылып, алғашқы медициналық-санитариялық көмекті жаңғырту жөніндегі ұлттық бағдарлама аясында жүзеге асырылды. Бұл бастама – мемлекеттің әйелдер денсаулығына деген қамқорлығының тағы бір жарқын көрінісі.
Әрине, әйел – отбасының өзегі, ұлттың ұйытқысы. Оның денсаулығы – ел болашағының кепілі. Осы ұстанымды басшылыққа алған жаңа консультация әйелдерге жүктілікке дейінгі, жүктілік кезіндегі және босанғаннан кейінгі кезеңдерде сапалы, қауіпсіз, әрі қолжетімді медициналық көмек көрсетуді көздейді.
Жаңартылған консультация бөлімшесі – тек дәрігерлер мен құрылғылардың жиынтығы емес, сенім мен кәсібиліктің тоғысқан мекені. Мұнда тәжірибелі акушер-гинекологтар, ультрадыбыстық зерттеу (УДЗ) мамандары және отбасын жоспарлау бойынша кеңес берушілер қызмет етеді. Заманауи диагностика құралдары ауруды ерте кезеңде анықтап, дер кезінде емдеуге мүмкіндік береді.
Айрықша атап өтерлік қызметтердің бірі – болашақ аналарға арналған мектеп. Мұнда аналарға жүктілік кезіндегі күтім, дұрыс тамақтану, психологиялық дайындық туралы кеңестер беріледі. Сонымен қатар заңгерлік және психологиялық көмек те көрсетіледі. Бұл – әсіресе қиын өмірлік жағдайға тап болған әйелдер үшін таптырмас қолдау.
Жаңа консультация бөлімшесінің ашылуы – мемлекетіміздегі әйелдерге көрсетілетін медициналық көмектің жүйелі түрде жақсарып келе жатқанының айғағы. Қазақстан Республикасының «Халық денсаулығы және денсаулық сақтау жүйесі туралы» Кодексіне сәйкес қабылданған амбулаториялық-емханалық деңгейдегі көмек көрсету бағдарламасы аясында жүзеге асырылып отырған бұл жоба – үлкен бастаманың бір бөлігі ғана.
Бағдарлама аясында жүкті әйелдерге пренаталдық скрининг, генетикалық тексерулер, психопрофилактика, онлайн кеңес беру, үйге патронаж жасау қызметтері ұсынылады. Қауіпті факторлар анықталған жағдайда әйелмен жеке жұмыс істеліп, мультидисциплинарлық тәсіл арқылы жан-жақты қолдау көрсетіледі.
Сондай-ақ түсік жасатудың алдын алу, отбасы құндылықтарын насихаттау, басқа медициналық мекемелермен өзара әрекеттестік, ана мен бала өлімін азайту бағытындағы кешенді шаралар атқарылып жатыр.
Қазіргі медицина тек емдеумен шектелмейді. Оған аурудың алдын алу, түсіндіру, жанға демеу болу, адамның жағдайына түсіністікпен қарау жатады. Тараздағы жаңа әйелдер консультациясы осы талаптардың барлығына сай. Бұл – техникалық мүмкіндіктері кең, адами қарым-қатынасы жоғары, нағыз заманауи емхана.
Әйелдің денсаулығына көрсетілген әрбір назар – ұлт болашағына жасалған инвестиция. Осындай орталықтардың ашылуы – тек медициналық жүйені дамыту ғана емес, қоғамдағы әйелдің рөліне, аналық миссияға, өмірге келген әрбір сәбидің дені сау болуына қосылған үлес.
Таразда ашылған жаңа әйелдер консультациясы — тек медицина саласындағы жаңалық емес, ізгілік пен кәсіби жауапкершіліктің тоғысқан тұсы. Бұл – ананың амандығы мен сәбидің саулығын басты құндылыққа айналдырған мекен.
Әрбір әйел өз денсаулығына сенімді болуға, әрбір болашақ ана өз жүктілігін қуанышпен өткеруге, әрбір отбасы бала сүю бақытын қауіпсіз жағдайда сезінуге тиіс. Ал мұндай орталықтар – сол арманды жүзеге асыруға бағытталған нақты қадам.
Жұмаш ЖОЛБОЛДЫ
