Белсенді өмір – ұзақ жасау кепілі
Қарттардың бос уақытын ұтымды пайдалануы, егде жастағы азаматтардың белсенді өмір салтын ұзартуға мотивациясын қалыптастыру және дамыту мақсатында елімізде белсенді өмір сүру орталықтар ашылуда. Дәл осындай орталық өткен жылы Тараз қаласының төрінде ашылған болатын. Күні кеше құрылғанына 1 жыл толған облыс әкімдігінің жұмыспен қамтуды үйлестіру және әлеуметтік бағдарламалар басқармасының «Белсенді ұзақ өмір орталығында» «Белсенді ұзақ өмір – жүз жасты тойлауға кепіл» атты мерекелік шара өтті.
Салтанатты жиынға облыс әкімдігі жұмыспен қамтуды үйлестіру және әлеуметтік бағдарламалар басқармасының басшысы Еркін Келесов, облыстық ардагерлер кеңесінің төрағасы Еркінбек Солтыбаев, қалалық ардагерлер кеңесінің төрағасы Күләш Әбдікешова, облыстық Ардагерлер кеңесі Билер алқасының төрағасы Оңласын Есіркепов және облыс әкімдігінің жұмыспен қамтуды үйлестіру және әлеуметтік бағдарламалар басқармасы Ардагерлер кеңесінің төрағасы Ескендір Жүнісов және қала тұрғындары қатысты. Мерекелік кеште әуелі орталық директоры Олжас Ақылбаев 1 жыл ішінде атқарылған жұмыстарға тоқталды.
– Орталық Жамбыл облысы әкімдігінің 2023 жылғы 28 ақпандағы №29 қаулысы негізінде құрылып, 2023 жылдың 30 қарашасы күні облыс әкімі Ербол Қарашөкеевтің қатысуымен ашылды. Орталықтың мақсаты – өңірдегі зейнет жасына жеткен белсенді, өмір жасын ұзартуды көздеген қарт адамдарға мемлекет тарапынан мүмкіндіктер жасау арқылы денсаулығын қолдау, көңіл күйін көтеру және бос уақытын тиімді ұйымдастыру, қоғамның белсенді өміріне тарту.
Өздеріңізге белгілі, орталықтың ашылғанына биыл 1 жыл толып отыр. Бүгінде мекемеде 40-тан астам қызметкер бар. Мекеменің штаты білікті мамандармен қамтамасыз етілген. Қызметкерлер ішінде әлеуметтік жұмыс мамандары, дәрігер, психолог, хореограф, йога нұсқаушылары, музыка жетекшісі, шахмат нұсқаушысы мекілді мамандар қызмет етеді. Орталық ашылғаннан бері мыңға жуық қызмет алушы қабылданды. Бүгінде біз 7 арнаулы әлеуметтік бағытта 25 түрлі қызмет түрін көрсетеміз, – деген Олжас Бақытұлы қадірлі қонақтар мен орталық қызыметкерлерін келе жатқан Жаңа жыл мерекесімен құттықтады.
Әрі қарай салтанатты шара орталықтың қызымет алушылары дайындаған концерттік бағдарламаға ұласты.
Жұмаш ЖОЛБОЛДЫ
