АҚШ елшісі – Дулати университетінде

М.Х.Дулати атындағы Тараз өңірлік университетіне АҚШ-тың Қазақстан Республикасындағы Төтенше және Өкілетті елшісі Дэниел Розенблюм ресми сапармен келді. Делегация құрамында Бас консул Мишель Еркин, қоғаммен байланыс жөніндегі көмекші Деже Джури Холмс, координаторлар Ерасыл Толеугазинов және Анар Хамзина болды.

Кездесу мақсаты – өзара тиімді стратегиялық ынтымақтастықты дамыту және бірлесе жұмыс жасау арқылы жастарға білім мен дағдыны пайдаланып, тәжірибе алу арқылы кәсіби салаға қадам басуға мүмкіндіктер ашу.
Әуелі басқарма төрағасы – ректор Мұхтар Байжұманов қонақтарға жылы лебізін білдіріп, Қазақстан Республикасы мен АҚШ арасындағы ғылыми-техникалық және білім беру саласындағы ынтымақтастық оң бағытта дамып жатқанын жеткізді. Сондай-ақ ол өз сөзінде білім беру бағдарламаларын кеңейту, ғылыми жобаларға инвестиция тарту, сондай-ақ қазақстандық және жетекші америкалық университеттер арасында тәжірибе алмасу бойынша жұмыстар жүргізіліп жатқанын тілге тиек етті.
Дэниел Розенблюм өз кезегінде студенттерге «АҚШ-тың Орта Азиядағы сыртқы саясаты» туралы ағылшын тілінде дәріс жүргізіп, тұрақты даму мәселесіне баса тоқталып, тәжірибесімен бөлісті.
Студенттер қонаққа өздерін қызықтырып жүрген академиялық бағдарламалар, Орталық Азия аймағындағы халықаралық ұйымдардың маңызы, әрі Дэниел Розенблюмнің дипломат ретінде қалыптасуы жайлы сауалдарына жауап алды. Сонымен қатар студенттер АҚШ-тағы білім беру жүйесімен, мәдени ерекшеліктерімен жақынырақ танысты.
Кездесу аясында екі тарап өкілдері ағылшын тілін оқытуды ілгерілету саласындағы және түрлі ғылыми ізденістерге ынтымақтастықты жалғастыруға ниет танытты.
Қонақтар бас ғимаратта орналасқан мұражайда М.Х.Дулатидің шығармашылығымен танысып, әйгілі тарихшының жәдігерлері мен қоғамдық қызметін сипаттайтын мұрағат құжаттар, тарихи фотосуреттер, сирек басылымдарына қызығушылық танытты. Сондай-ақ Дулати ұжымының қонақжайлығы мен жылы қабылдауына алғыстарын ризашылықтарын жеткізіп, білім ордасы алдағы уақытта да биік белестерді бағындыратынына тілектестіктерін білдірді.

Аман ЕСЕН