Корея-Қазақстан мәдени алмасу жылы аясында қандай шаралар өтеді
2022-2023 жылдар Корея мен Қазақстанның өзара мәдени алмасу жылы деп жарияланды. Осыған орай, Кореяның Мәдениет, спорт және туризм министрлігі мен Корея халықаралық мәдени алмасу агенттігі бірігіп, түрлі салада мәдени-ағарту іс-шараларын өткізеді, деп хабарлайды ҚазАқпарат. Екі ел достығын насихаттайтын қандай мәдени шаралар өтетініне шолу жасауды жөн көрдік.
❙ Деректі фильм
Кореяның өнер академиясы Қазақстандағы Темірбек Жүргенов атындағы Ұлттық өнер академиясымен бірлесе отырып, «Корея және Қазақстан: диаспора уақыты мен кеңістіктер қиылысы» атты тақырыпта төрт деректі фильм түсіріп жатыр.
❙ Дәстүрлі көрсетілім
23 қыркүйекте Қазақстандағы Алматы театрында Ұлттық халық аспаптар оркестрі мен пансори шебері, сондай-ақ қазақтың дәстүрлі аспабы – домбырада ойнайтын музыкант бірлесіп концерт өткізеді. Концертте түрлі музыкалық шығармалар – дәстүрлі халық әндерінен бастап, қазақ композиторы Еркеш Шәкеевтің классикалық шығармаларына дейін екі ел арасындағы достықты дәріптейтін ұлттық аспаптармен қайта өңделген заманауи музыка орындалады.
❙ Анимациялық фильм
Кореяның «Бучон» халықаралық анимация фестивалі және Қазақстанның «Байқоңыр» халықаралық қысқаметражды фильмдер фестивалі бірлесіп, анимациялық фильмдердің арнайы көрсетілімін ұйымдастырады. 8 қыркүйекте Қазақстанда «Корей анимациясының арнайы көрсетілімі» өтеді. Онда Кореяның 12 анимациялық фильмі көрермен назарына ұсынылады, оның ішінде Ли Сонг Гангтың «Ая ханшайымы» және режиссер Лим Чэ Риннің «Мен жайлы» фильмдері бар. Аталған режиссерлер арнайы дәріс өткізіп, көрермендермен кездеседі, оның ішінде «Ая ханшайымында» Ая рөлін сомдаған әнші Бэк Аёнмен диалог жоспарланған. «Қазақстандық анимацияның арнайы көрмесі» аясында 21 қазанда Кореяда кезекті «Корей анимациясының арнайы шоуы» өтеді.
❙ Жастар театры
Корей халықаралық мәдени алмасу қоры Республикалық мемлекеттік академиялық корей театрымен бірлесе отырып, қалың көрерменге театр туындысын сахналамақ. Қойылым 11 және 12 қарашада Қазақстанның ұлттық және мемлекеттік театрларында көрсетіледі деп күтілуде. Екі ел жастарының бұл бірлескен қойылымы Қазақстан Ұлттық банкінің ескерткіш монетасында бейнеленген корей мифологиясының кейіпкері -Дангунның оқиғасына негізделген. Бұл туынды академиялық корей театрында көрсетілетін болады.
❙ Арнайы фотокөрме
14 қараша мен 8 желтоқсан аралығында Қазақстан Республикасының Ә.Қастеев атындағы мемлекеттік өнер мұражайында атақты фотограф Ким Ок Сонның жеке көрмесі өтеді. Көрмеде фотограф әртүрлі себептермен көшіп келген адамдардың өмірі мен маңызды тарихи оқиғаларды қамтитын 50-ден астам жұмыстарын ұсынады.
