Қазақстанда құрылысшылардың жалақысы бір жылда 33 пайызға өсті
2021 жылдың үшінші тоқсанында еліміздің құрылыс секторында 640,7 мың адам жұмыспен қамтылды, бұл бір жыл бұрынғыдан 3%-ға көп, деп хабарлайды «Jambyl-Taraz» ақпарат агенттігі Stan.kz сайтына сілтеме жасап.
2020 жылы секторда жұмыспен қамтылғандар саны 621,8 мың адамды құрады, жылына минус 3,1%. Өңірлік тұрғыда салада жұмыспен қамтылғандардың басым бөлігі елордада тіркелген: 74,7 мың адам, жылына 11,3%-ға артқан. Алматы мен Түркістан облысы да жетекші өңірлердің үштігіне енді.
Құрылыста жұмыспен қамтылғандардың ең аз саны Солтүстік Қазақстан облысында тіркелді: 11,2 мың адам, 2,9%-ға кем. Салада жұмыспен қамтылғандар санының ең көп өсімі Шығыс Қазақстан облысында (25,3%-ға, 34,1 мың адамға дейін), ең көп төмендеуі – Қарағанды облысында (7,6%-ға, 35,9 мың адамға) байқалды.
Қазақстанда құрылыс саласында кадр тапшылығы өткір сезілуде. 2020 жылмен салыстырғанда биыл нарықтағы бос жұмыс орындарының саны 53 пайызға артқан. Негізгі жұмыс іздеу қызметтерінің бірінің айтуынша, бұл елдегі жылжымайтын мүлікке сұраныстың артуына байланысты. Құрылыс жұмысшыларының орташа айлық атаулы жалақысы ағымдағы жылдың үшінші тоқсанында 314,3 мың теңгеге жетті, бұл өткен жылмен салыстырғанда құндық мәнде 32,5%-ға артық.
Саладағы жалақының нақты өсімі жылына 21,9%-ды құрады. Ең жоғары орташа айлық жалақыны Атырау облысының еңбекшілері алады: 465,4 мың теңге, плюс 44,3%.
Маңғыстау облысы мен елорда құрылысшылары да салада жоғары жалақы алады. Үздік үш аймақта ғана жалақы республикалық деңгейден жоғары. Ең аз жалақыны Қызылорда облысының қызметкерлері алады: бар болғаны 166,8 мың теңге – бір жыл бұрынғыдан 11,8%-ға артық.
