Жұлдыз Әбдукәрімова театрға жұмысқа тұрды

10 жыл бойы бала тәрбиесімен айналысқан Жұлдыз Әбдукәрімова 2017 жыл «Арман. Когда ангелы спят» фильмі арқылы елдің алдына шықты. Жұлдыз бұл фильмнен кейін тележүргізушілікке бет бұрып, бірнеше бағдарламаны жүргізді. Енді актриса театр сахнасына қайта оралғанын хабарлады, деп хабарлайды “Jambyl-Taraz” ақпарат агенттігі Stan.kz сайтына сілтеме жасап.

Жұлдыз Әбдукәрімова жары Қайрат Нұртаспен бір академияда білім алған. Мамандығы – актриса. Студент кезінде театрда жұмыс істегенімен, тұрмысқа шыққан соң өзін толықтай отбасына арнаған. Араға жылдар салып, актриса өз саласына қайта оралғанын хабарлады. Ол Түркістанда ашылған жаңа театрда жұмыс істемек. Алғашқы қойылымның күні де белгілі.

«Қашан сізді кинодан, театрдан көреміз?» деген ең жиі қойылатын сұраққа бүгін жауап бере кетейін. Араға 10 жылдан астам уақыт салып, театр төріне қайта оралдым. Алланың қалауымен, бұл қадамым киелі өңірдің жаңа театрынан @turkistan_theatre бастау алды. Мұны өзім іштей жақсылыққа жорыдым.

Жүректің күй сандығынан тәтті ән шығарар сезімге толы сырлы пьеса «Махаббат мұнарасында» мен Сұлудың рөлінде ойнаймын. Өнердің шын жанашырлары мен менің қолдаушыларымды 17-18 желтоқсан күні @turkistan_theatre-на шақырамын», – деп қуанышымен бөлісті Жұлдыз.