«Көлсай көлдері» паркі ЮНЕСКО-ның Бүкіләлемдік желісіне енгізілді
«Көлсай көлдері» ұлттық мемлекеттік табиғи паркі ЮНЕСКО-ың бүкіләлемдік биосфералық резерваттар желісіне қосылды, – деп хабарлайды «Jambyl-Taraz» ақпарат агенттігі Tengrinews.kz сайтына сілтеме жасап.
Мұндай шешім ЮНЕСКО бағдарламасының «Адам және биосфера» халықаралық үйлестіру кеңесінің 33-сессиясында қабылданды.
«Мұнда сирек кездесетін және жойылып кету қаупі төнген көптеген жануарлар мекендейді, атап айтқанда Тянь-Шань қоңыр аюы, ақ барыс және Түркістан сілеусін. Биосфералық қорық 242 085 га аумақты алып жатыр және оңтүстікте Қырғызстанның Ыстықкөл биосфералық қорығымен шектеседі», – дейді ЮНЕСКО.
Осылайша, бүгінгі таңда ЮНЕСКО ұлттық желісінің Қазақстандағы биосфералық резерват саны – 13. Бұл сан Орталық Азияның басқа елдеріндегі биосфералық резерваттар санынан едәуір асып түседі. Биосфералық резерваттар көлемінің осылай танылуы Қазақстанның биологиялық әртүрлілігін сақтау мәселелеріне әлемдік қоғамдастықтың назарын аударғанын және оны болашақ ұрпақ үшін сақтауға ұмтылатынын айғақтайды.
