Әкімдер вакцинацияға неге жүрдім-бардым қарап жүр?
Жамбыл облысының әкімі Бердібек Сапарбаевтың төрағалығымен өткен кезекті аппараттық кеңесте өңірдегі санитарлық-эпидемиологиялық ахуал, жалпыұлттық санаққа қатысты мәселелер талқыланды.
Соңғы екі аптада коронавирус жұқтырғандар саны 1193-тен 626-ға дейін төмендеді. Қазіргі таңда инфекциялық стационарларда 1313 адам ем алуда, төсек-орын 37 пайызға толтырылған. Жансақтау бөлімінде 120 адам жатыр.
Денсаулық сақтау басқармасының басшысы Әсет Қалиев бүгінгі күнге дейін 403 516 жамбылдық немесе екпе алуға жататын жалпы жоспардағы тұрғындардың 69,5 пайызы вакцина қабылдағанын жеткізді. Төмен көрсеткіштер Тараз, Талас, Жуалы, Шу, Мойынқұм аудандарында тіркелуде.
Аймақ басшысы вакцинациялау нәтижесіне көңілі толмайтынын жеткізді.
– Неліктен біздің өңірде вакцинация көрсеткіші төмен? Аудан әкімдері бұл мәселені жеке өздері, тұрақты түрде бақылауға алуы тиіс. Дәл қазір вакцинация мәселесіне жауапкершілікпен қарау керек. Бұл орайда ауыл әкімдерімен тығыз жұмыс жасау қажет. Олар күн сайын екпе алғандардың саны туралы жаңа мәліметтер беріп отыруы керек. Әкімдер бұл істе ұйымдастырушылық, іскерлік қабілеттерін барынша таныта түскені абзал. Халық сайлаған әкімдерге үлкен жауапкершілік жүктеледі. Олар өздеріне артылған сенімді ақтауы, үйлестірушілік қабілеттерін көрсетуі тиіс. Вакцинация халық арасында ұжымдық иммунитетті қалыптастыруға және инфекцияның одан әрі таралуын шектеуге мүмкіндік береді. Дәл осы фактор пандемиямен күресте аса маңызды, – деді облыс әкімі.
Жиынның күн тәртібіндегі екінші мәселе бойынша жалпыұлттық халық санағын өткізу жайы қаралды.
Бірінші қыркүйекте Қазақстанда ұлттық халық санағы басталды. Ол «Қазақстанда әркім маңызды!» ұранымен өтуде. 1 қыркүйектен 15 қазанға дейін sanaq.gov.kz сайты арқылы онлайн-режимде тіркелуге болады. Статистика департаментінің басшысы Сырым Мәдиев 6 қыркүйектегі деректер бойынша 18240 жамбылдық онлайн-сауалнамадан өткенін хабарлады.
Облыс әкімі жауапты тұлғаларға интервьюерлердің қоғамдық көлікте тегін жүру мәселесін шешу, халық арасында түсіндіру жұмыстарын күшейту жөнінде бірқатар тапсырма жүктеді.
