Қазақстанда QazVac вакцинасының клиникалық зерттеулері сәтті өтті
Қазақстанда QazVac коронавирусқа қарсы отандық вакцинаның клиникалық сынақтарының үшінші кезеңі аяқталып, нәтижелері кем дегенде алты айдан кейін белгілі болады. Бұл туралы Биологиялық қауіпсіздік проблемалары ғылыми-зерттеу институтының бас директоры Күнсұлу Закария мәлімдеді.
«Үшінші кезең бойынша барлық клиникалық зерттеу аяқталды. 9 шілдеде соңғы талдаулар жиналды. Шілде айының соңына дейін деректердің үлкен көлемін өңдеу, статистикалық талдау жүргізілді. Қорытынды есепті шілде айының соңында дайындады, ол Дәрілік заттар мен медициналық бұйымдарды сараптау ұлттық орталығына жіберілді», – деп хабарлады Күнсұлу Закария ОКҚ онлайн-брифингінде.
Айтуынша, есеп әлі де сараптамадан өтуде. Алғашқы Қазақстандық QazVac вакцинасының клиникалық зерттеулері сәтті өткен. Енді қазақстандық ғалымдар қазақстандық ғылымның жетістігін көрсету үшін кезекті жетекші жоғары рейтингті журналға мақаласын дайындай бастайды.
«Мұндай мақалалар бірден жарияланып кетпейді. Дәл қазір журналға жібере алмаймыз. Біз сараптама алғаннан кейін сараптама қорытындысы туралы шешімді журналдың редакциясына жібереміз. Шамамен, жылдың соңында немесе келесі жылдың басында келесі мақаланы жариялаймыз. Жоғары рейтингті журнал беделіне сай жұмыс істейді. Олар біздің мақалаларымызда алған деректерді толығымен растауы керек. Сондықтан мақалаларды қарау процесі ұзақ. Бірақ COVID тақырыбы қазір өзекті болғандықтан, біз алты ай ішінде келесі мақаламыз жарияланады деп ойлаймыз”, – дейді Күнсұлу Закария.
