Облыс аумағында шектеу қойылды
Елімізді ғана емес, әлемді дүрліктірген індеттің алдын алу мақсатында облыста бұған дейін арнайы блокпосттар қойылған болатын. Ағымдағы жылдың 31 наурызында 00:00-ден бастап Тараз қаласы мен аудандарға кіріп-шығу шектелді.
Зере Қуаныш
Бұл орайда өңірлік коммуникациялар қызметінің ақпарат алаңында «Жамбыл облысы аумағында шектеу шараларын енгізу туралы» тақырыбында онлайн баспасөз конференциясы өтті. Жиында Жамбыл облысының бас мемлекеттік санитарлық дәрігері Ғазиз Надуев 2020 жылдың 30 наурыздағы №3 «Жамбыл облысы аумағында шектеу шараларын енгізу туралы» қаулымен көпшілікті таныстырды.
– Транзиттік автокөлікті, сондай-ақ Жамбыл облысы мен Тараз қаласының өнеркәсіп, ауыл шаруашылығы кәсіпорындарының үздіксіз жұмыс істеуін және тыныс-тіршілігін қамтамасыз ету үшін азық-түлік тауарлары, дәрілік заттар және медициналық бұйымдар, өндірістік тауарлар мен материалдары бар автокөлікті қоспағанда, автокөлік құралдары мен азаматтардың барлық түрлерінің Жамбыл облысы мен Тараз қаласының аумағына (аумағынан) келуіне және шығуына тыйым салынады. Мемлекеттік органдар мен ұйымдардың басшыларына, сондай-ақ меншік нысанына қарамастан заңды тұлғаларға, жеке кәсіпкерлер мен жеке тұлғаларға (адамдар көп жиналатын объектілердің меншік иелері мен жалға алушыларына) техникалық және ұйымдастырушылық мүмкіндіктері болған жағдайда қызметкерлерді қашықтықтан жұмыс режиміне көшіру ұсынылады, – деді Ғазиз Дүйсенбекұлы.
Сондай-ақ барлық мемлекеттік және жеке меншік балабақшалардың, сауда орталықтарының (ондағы азық-түлік дүкендері мен дәріханаларды қоспағанда), саябақтар мен скверлердің, зоомагазиндердің, монша кешендерінің (оның ішінде жекелеген кабинкаларды қоспағанда), санаторий-курорттық объектілердің, сұлулық салондарының, шаштараз, сауна мен массаж кабинеттерінің, бильярд залдарының, компьютерлік, интернет клубтарының, ойын залдарының, боулинг-орталықтардың, букмекерлік кеңселердің, лото, спорт кешендерінің (үйірмелер, секциялар), футбол алаңдарының, балаларды дамыту орталықтарының және жаппай жиналатын басқа да объектілердің; азық-түлік тауарларының жәрмеңкелері; үйлену салондары, көлік жуу орындары, салтанат залдары; жеткізу арқылы тауарларды өткізу мүмкіндігін сақтай отырып, ұялы (ұялы) телефондарды сату және жөндеу дүкендері мекемелерінің қызметі тоқтатылады. Дегенмен санитарлық-дезинфекциялық режимді міндетті түрде сақтай отырып, бөлшек сауда азық-түлік базарларының жұмыс уақытын сағат 10.00-ден 17.00-ге дейін шектеу (күніне екі рет дезинфекциялық іс-шаралар өткізу, антисептиктері бар санитайзерлер орнату) қарастырылған. Сонымен қатар көтерме азық-түлік қоймалары мен базарлар, супермаркеттер, азық-түлік сауда орындары, үйдегі дүкендер мен дәріханалар қалыпты режимде жұмысын жалғастырады. Ал қоғамдық тамақтану объектілеріне (кафе, мейрамханалар, барлар, асханалар және басқалар), азаматтардың осындай объектілердің үй-жайларына бармай, тапсырыстарды шығаруға және жеткізуге әдеттегі режимде қызмет көрсетуді қоспағанда, жұмысты тоқтату қажет. Сондай-ақ қаулыда азық-түлікті, бірінші кезекте қажетті заттарды, дәрілік заттар мен медициналық бұйымдарды сатып алуды, медициналық көмекке жүгінуді, сондай-ақ күтпеген төтенше жағдай және адамның өмірі мен денсаулығына қауіп төндіретін басқа да жағдайларды қоспағанда, аса қажетсіз тұрғын үйден шығуды шектеу мен отбасы мүшелерін қоспағанда, үш адамнан аспайтын топтармен жүруін шектеу, 65 жастан асқан азаматтарға өзін-өзі оқшаулау режимін сақтау қажеттілігі айтылған.
