МӘМС аясында көз ауруларын емдеу: нені білу қажет?

Көру қабілетінің нашарлауы, көздің ауруы және басқа да офтальмологиялық мәселелер кезінде медициналық көмекке уақытылы жүгіну маңызды. Міндетті әлеуметтік медициналық сақтандыру (МӘМС) жүйесі аясында азаматтарға медициналық көрсетілімдерге сәйкес көз ауруларын диагностикалау және емдеу бойынша бірқатар қызметтер қолжетімді. Бұл туралы «Әлеуметтік медициналық сақтандыру қоры» КЕАҚ Жамбыл облысы бойынша филиалы хабарлайды.

Офтальмологқа қалай қаралуға болады?
Көру қабілеті нашарлаған жағдайда алдымен өзіңіз тіркелген емханадағы учаскелік дәрігерге жүгіну қажет. Дәрігер пациенттің жағдайын бағалап, қажетті бастапқы тексерулерді ұйымдастырады. Медициналық көрсетілімдер болған жағдайда офтальмолог дәрігерге жолдама береді. Офтальмолог тексеру нәтижелері бойынша диагноз қойып, тиісті емдеу тәсілін анықтайды. Аурудың түрі мен ауырлығына қарай дәрі-дәрмекпен емдеу, лазерлік емшара немесе хирургиялық операция ұсынылуы мүмкін.

Медициналық көмек қандай форматта көрсетіледі?
Офтальмологиялық көмек пациенттің жағдайы мен медициналық көрсетілімдеріне қарай бірнеше форматта көрсетіледі:
Амбулаториялық көмек – дәрігердің қабылдауы, қажетті диагностикалық тексерулер және емдеу шаралары.
Күндізгі стационар – пациенттің медициналық ұйымға күндіз келіп, қажетті емшаралардан немесе операциялардан өтуі.
Тәулік бойы жұмыс істейтін стационар – пациенттің жағдайына байланысты үздіксіз медициналық бақылау мен емдеуді қажет ететін жағдайларда көрсетілетін көмек. Емдеу форматын және қажетті медициналық араласуды емдеуші дәрігер анықтайды.

МӘМС қандай көз ауруларын емдеуді қамтиды?
МӘМС жүйесі аясында белгіленген талаптар мен медициналық көрсетілімдерге сәйкес мынадай офтальмологиялық қызметтер көрсетілуі мүмкін:
көз жарақаттарын диагностикалау және емдеу;
глаукоманы диагностикалау және емдеу;
катарактаға байланысты медициналық көмек, оның ішінде көрсетілімдер бойынша хирургиялық операциялар;
көз ауруларын емдеудің тиісті лазерлік әдістері;
медициналық көрсетілімдер болған жағдайда көздегі ісіктерді алып тастау;
МӘМС пакетіне кіретін басқа да офтальмологиялық қызметтер.
Мысалы, глаукоманың кейбір түрлерінде лазерлік емшаралар қолданылса, катаракта кезінде хирургиялық емдеу ұсынылуы мүмкін. Ал көздің мөлдір қабығын трансплантациялау сияқты күрделі операциялар тиісті медициналық көрсетілімдер мен қолданыстағы тәртіпке сәйкес жүргізіледі.
Нақты медициналық қызметтің МӘМС есебінен көрсетілуі оның сақтандыру пакетіне енуіне, пациенттің медициналық көрсетілімдеріне және белгіленген тәртіпке байланысты.