Байзақ ауданында баспана бақыты: 140 отбасы жаңа пәтерге қол жеткізді
Байзақ ауданында тұрғындарды баспанамен қамту бағытындағы жүйелі жұмыстар өз жалғасын тауып келеді. Мемлекет басшысы жүктеген әлеуметтік саясаттың маңызды бағыттарының бірі – халықты қолжетімді тұрғын үймен қамтамасыз ету міндеті аудан көлемінде кезең-кезеңімен жүзеге асырылуда. Осы игі бастаманың нәтижесінде аудан орталығы Сарыкемер ауылында тұрғын үй кезегінде тұрған 140 отбасы жаңа баспананың кілтіне ие болды.
Салтанатты рәсімде пайдалануға берілген тұрғын үйлердің қатарында 60 пәтерлі бес қабатты және 80 пәтерлі бір қабатты тұрғын үйлер бар. Жобалар «Отбасы банк» АҚ арқылы жүзеге асырылып, әлеуметтік осал санаттағы азаматтардың тұрғын үй мәселесін шешуге мүмкіндік берді.
Жаңа қоныс иелерін құттықтаған аудан әкімі Олжас Баққараев тұрғындарды қуаныштарымен құттықтап, халықты баспанамен қамту – мемлекет жүргізіп отырған әлеуметтік саясаттың басым бағыттарының бірі екенін атап өтті. Оның айтуынша, аудан аумағында тұрғын үй құрылысы соңғы жылдары қарқын алып, бұл бағыттағы жұмыстар алдағы уақытта да жалғасады.
Байзақ ауданында соңғы үш жылдың ішінде тұрғын үй құрылысы айтарлықтай серпін алды. Осы уақыт аралығында барлығы 618 отбасы жаңа баспанаға қол жеткізді. Оның ішінде жеті көпқабатты тұрғын үйден 420 пәтер пайдалануға берілсе, 99 бір қабатты тұрғын үйден 198 пәтер тұрғындардың игілігіне тапсырылды. Бұл көрсеткіштер аудан тұрғындарының әлеуметтік жағдайын жақсартуға бағытталған мемлекеттік бағдарламалардың тиімді жүзеге асып жатқанын көрсетеді.
Бұдан бөлек, жыл соңына дейін тағы төрт бір қабатты тұрғын үйдің құрылысы толық аяқталып, қосымша сегіз пәтерді сатып алу жоспарланып отыр. Бұл өз кезегінде тұрғын үй кезегінде тұрған азаматтардың санын кезең-кезеңімен азайтуға мүмкіндік береді.
Жаңадан пайдалануға берілген тұрғын үйлер қазіргі заман талаптарына толық сәйкес салынған. Пәтерлер сапалы құрылыс материалдарымен тұрғызылып, барлық қажетті инженерлік-коммуникациялық инфрақұрылыммен қамтамасыз етілген. Атап айтқанда, тұрғын үйлерге ауыз су, электр энергиясы, табиғи газ, жылу және кәріз жүйелері толық жүргізілген. Сонымен қатар, тұрғындардың жайлы өмір сүруіне қажетті абаттандыру жұмыстары да назардан тыс қалмаған.
Іс-шара барысында «Отбасы банк» АҚ Жамбыл облыстық филиалы директорының орынбасары Талғат Жақсылықов, аудандық мәслихат төрағасы Бақтияр Ақбаев, аудандық ардагерлер кеңесінің төрағасы Бердібек Омаров және Қоғамдық кеңестің төрағасы Қыдырәлі Оралов сөз сөйлеп, қоныс иелерін жаңа баспаналарымен құттықтады. Олар мемлекет тарапынан көрсетіліп жатқан әлеуметтік қолдаудың тұрғындардың әл-ауқатын арттырудағы маңыздылығына тоқталып, жаңа шаңырақтарға құт-береке, молшылық пен ынтымақ тіледі.
Жаңа пәтерлер тұрғын үй кезегінде тұрған әлеуметтік осал санаттағы азаматтарға берілді. Атап айтқанда, толық емес отбасылар, көпбалалы аналар мен отбасылар, ерекше қажеттілігі бар балаларды тәрбиелеп отырған азаматтар, сондай-ақ І және ІІ топтағы мүгедектігі бар тұрғындар жаңа баспанаға ие болды. Бұл – мемлекет тарапынан әлеуметтік әділеттілікті қамтамасыз етуге бағытталған нақты қолдаудың көрінісі.
Жаңа пәтер кілтін алған тұрғындар қуаныштарын жасыра алмай, мемлекет тарапынан көрсетілген қолдау үшін алғыстарын білдірді. Олардың айтуынша, көптен күткен баспанаға қол жеткізу – әр отбасы үшін үлкен қуаныш әрі болашаққа деген сенімді арттыратын маңызды оқиға.
Байзақ ауданында халықты тұрғын үймен қамтамасыз ету бағытындағы жұмыстар алдағы уақытта да жалғасын табады. Мемлекеттік бағдарламалар аясында жаңа тұрғын үйлердің құрылысы кезең-кезеңімен жүргізіліп, тұрғын үй кезегінде тұрған азаматтарды баспанамен қамту көрсеткіші жыл сайын арта бермек. Бұл аудан тұрғындарының өмір сүру сапасын жақсартуға, әлеуметтік тұрақтылықты нығайтуға және халықтың әл-ауқатын арттыруға бағытталған маңызды қадамдардың бірі болып қала береді.
