Тұрғын үйді басқару саласы: өзекті мәселелер мен тиімді шешімдер
«AMANAT» партиясының «TURGYNDAR AMANATY» жобасы аясында «Үйді басқару: жауапкершілік, сенім, нәтиже» атты форум өтті.
Іс-шара барысында көпқабатты тұрғын үйлерді басқару, коммуналдық инфрақұрылымды жаңғырту, қауіпсіздікті қамтамасыз ету, тұрғындармен кері байланысты күшейту және МИБ пен ПИК жұмысының тиімділігін арттыру мәселелері қаралды.
Форумға «AMANAT» партиясының Хатшысы Шолпан Каринова, Жамбыл облысының әкімі Ербол Қарашөкеев, ҚР Парламенті Мәжілісінің депутаты Мұқаш Ескендіров, ҚР Өнеркәсіп және құрылыс министрлігінің өкілі Қанат Мыңбаев, мәслихат депутаттары, мемлекеттік және коммуналдық сала мамандары, сондай-ақ МИБ пен ПИК басшылары қатысты.
Жиында Шолпан Каринова аталған жоба көппәтерлі тұрғын үйлерге қатысты қордаланған мәселелерді шешуге бағытталғанын атап өтті. Жоба аясында басқару субъектілерін оқыту, депутаттармен кері байланысты арттыру, әкімдіктермен өзара іс-қимылды күшейту, аулаларды абаттандыру және «Халық қатысатын бюджет» тетігін тиімді пайдалану көзделген.
Өз кезегінде облыс әкімі Ербол Қарашөкеев тұрғын үйді басқару мәселелері халықтың тұрмыс сапасына және мемлекеттік органдарға деген сеніміне тікелей әсер ететінін жеткізді. Сонымен қатар, басқару жүйесіндегі ашықтықты арттыру мен жаңа басқару мәдениетін қалыптастырудың маңыздылығына тоқталды.
Бүгінде өңірде 2 101 көппәтерлі тұрғын үй бар. Оның 1 921-і кондоминиум нысаны ретінде тіркелуі тиіс болса, қазіргі таңда 1 811 тұрғын үй тіркелген. Қалған 110 тұрғын үйді жыл соңына дейін тіркеу жоспарлануда.
Мәжіліс депутаты Мұқаш Ескендіров елдегі әлеуметтік-экономикалық даму мен тұрғындардың әл-ауқатын арттыру бағытында заңнамалық деңгейде жүйелі жұмыстар жүргізіліп жатқанын атап өтті.
Сондай-ақ, Қанат Мыңбаев тұрғын үй-коммуналдық шаруашылық саласындағы өзекті мәселелерді көтеріп, оларды шешу жолдары қарастырылып жатқанын жеткізді.
Форум барысында Тараз қаласының әкімі Бақытжан Орынбеков облыс орталығындағы атқарылып жатқан жұмыстар туралы баяндама жасады. Сонымен қатар, сала өкілдері Елена Цой мен Мирасхан Дауылбаев жобаның маңыздылығына тоқталып, алдағы уақытта бірлескен жұмысты жалғастыруға дайын екендерін білдірді.
Іс-шара оқыту семинарымен жалғасып, қатысушылар тәжірибелік білімдерін жетілдіріп, жаңа дағдыларды меңгерді.
