Таразда саяси менеджмент бойынша кадрлық әлеуетті дамытуға арналған модульдік бағдарлама басталды

Тараз қаласында Саяси менеджмент академиясы ұйымдастырған жергілікті мемлекеттік басқару органдары мен қоғамдық-саяси ұйымдардың басшылары мен кадрлық активінің функционалдық құзыреттерін дамытуға арналған модульдік білім беру бағдарламасы басталды.
Бағдарлама заманауи басқарушылар корпусын қалыптастыруға бағытталған және үш кезеңнен тұрады: білімді игеру, практикалық шешімдерді енгізу және нәтижелерді бағалау. Оқыту процесі теория мен практиканы ұштастыра отырып, нақты әрі өлшенетін нәтижелерге қол жеткізуге мүмкіндік береді.
Бағдарламаның бірінші кезеңінде офлайн-интенсив форматында дәрістер, кейстерді талдау, рөлдік ойындар мен топтық пікірталастар өткізіледі. Қорытындысында қатысушылар тестілеуден өтіп, KPI көрсеткіштерімен жобаларын әзірлейді. Екінші кезеңде жобалар кураторлардың сүйемелдеуімен кәсіби қызмет барысында іске асырылады және қосымша офлайн сессиялар ұйымдастырылады. Үшінші кезеңде жобалар қорғалып, қатысушылардың рейтингі қалыптастырылады.
Бағдарлама аясында заманауи цифрлық білім беру платформасы (LMS/CRM) қолданылып, әрбір қатысушыға жеке білім беру траекториясын қалыптастыру мүмкіндігі ұсынылады.
Оқу барысында қатысушылар басқару тиімділігін арттыру, халықпен кері байланысты күшейту және мемлекеттік пен партиялық бастамаларды іске асыруға қажетті практикалық дағдыларды меңгереді.
Курстың салтанатты ашылуына партияның облыстық филиалының төрағасы Дауыл Бейсенқұлов және Орталық аппараттың өкілдері қатысты.
Бағдарлама жергілікті деңгейдегі басқару тиімділігін арттыруға және кадрлық әлеуетті нығайтуға бағытталған.