Қала әкімі жастармен кездесті
«Әкім бол, халқыңа жақын бол» деп қалың бұқара бекер айтпаған. Осы орайда, Тараз қаласының әкімі Қайрат Досаев жастармен ТEDx форматында кездесу өткізді.
Арайлым Шабденова
Тараз қаласы әкімдігінің ішкі саясат бөліміне қарасты Жастар ресурстық орталығының ұйымдастыруымен Жамбыл жоғары политехникалық колледжінде өткен кездесуге аталмыш оқу орнының белсенді жастары қатысты. Өз сөзін «2019 жыл – Жастар жылы деп жарияланғаны белгілі», – деп бастаған Қайрат Досаев бүгінде біздің елімізде жастарды қолдауға бағытталған бірқатар мемлекеттік бағдарламалар қабылданып, жастардың бос уақытын тиімді пайдалануына жағдай жасалып жатқанын тілге тиек етіп, кітап оқудың артықшылығына тоқталды.
– Денсаулығы мықты азамат болу үшін міндетті түрде спортпен шұғылдану керек. Бүгінде өз ісімді ашып, интеллектуалды, ғылыми, мәдени потенциалымды дамытамын деген адамға көптеген мүмкіндіктер бар, – деген шаһар басшысы студенттердің сауалдарына жауап берді.
Жиында «Атамекен» кәсіпкерлер палатасы тарапынан жастарды қолдауға бағытталған әртүрлі жобалар хақында, мемлекеттік қызметте жұмыс істеу туралы, қаланың әлеуметтік-экономикалық дамуына қатысты, т.б. сұрақтар қойылды. Шаһар басшысы өз сөзінде жастар тәрбиесі, қоғамдағы өзекті жайттарға қатысты тағылымды дүниелерге айрықша тоқталып, әр сауалдың жауабымен орайластырып, қала мен облыстағы оң бастамалар мен игі істерді де тілге тиек етіп отырды. Сонымен қатар қаланың әлеуметтік-экономикалық дамуына кеңінен тоқталып өткен шаһар басшысы жастардың қандай да бір ұсынысы болса тыңдауға дайын екенін жеткізді. Осылайша, еркін форматта өткен кездесуде біраз әңгіменің тиегі ағытылды деуге де болады. Ал жиын соңында жастар алған әсерімен бөлісіп, өздеріне бөлінген көңіл үшін қала әкіміне алғысын білдірді. Екі сағатқа созылған кездесуден кейін колледждің кабинеттерін аралап, экскурсия жасаған қатысушылар қала әкімімен естелік суретке түсті.
