Ғасырлар толғағының ғаламат туындысы

Тамыры терең Тараз – сан ғасырға созылған өркениет ізін сақтап қалған көне шаһар. Бұл қала – тек Жамбыл өңірінің ғана емес, күллі адамзат мәдениетінің алтын ұясына айналған асыл мұра. Қойнауы сырға, топырағы тарихқа толы Тараз өзінің екі мың жылдан астам ғұмырында талай белестерді артта қалдырды. Ол дәуірлердің өркендеуін де, құлдырауын да, жойқын соғыстардың зардабын да, қайта жаңғырудың қуанышын да бастан өткерді.

Тарихи жазба деректерде қаланың атауы «Тараз», «Талас», «Банки», «Ианги» немесе «Ианки» деп аталғаны жөнінде мәліметтер кездеседі. Оның сонау замандардан бергі тарихы жайлы материалдық және жазба ескерткіштер, ғылыми-зерттеу туындылары жетерлік. Мәселен, алғаш Тараз туралы 568 жылы жазбаға түскен византиялық деректен кейінгі 630 жылы қалаға келген қытайлық монах Сюань Цзян: «Таразда әртүрлі елдердің көпестері тұрады», – деп суреттесе, ІХ ғасырдың бірінші жартысында өмір сүрген математик және географ Мұхаммед ибн Мұса әл-Хорезми «Китаб сурат ал-ард» атты шығармасында: «Тараз – бұл көпестер қаласы», – деп жазған. Ал араб саяхатшысы Абу-Қасым ибн Хау-каль: «Тараз – мұсылман түріктердің сауда жасайтын орны, одан ары ешбір мұсылман бармайды, себебі оның шекарасынан кім өтсе, қарлұқтардың шатырына (қонысына) тап болады», – деп жазған. Арабтың тағы бір көрнекті географы Мұхаммед ибн Ахмед әл-Макдиси: «Тараз – үлкен бекіністі қала, көптеген бақтары бар, тығыз қоныстанған, онда төрт қақпасы бар және рабад орналасқан. Медина (Шахристан) қақпасы алдында үлкен өзен (Талас), оның арғы жағында қаланың бір бөлігі, оған қарай өткел бар. Жұма мешіт – базар ортасында», – деп жазса, көрнекті түркі ғалымы Махмұд Қашқари «Диуани лұғат-ат-түрік» атты еңбегінде: «Талас – Тараз атауымен белгілі қала. Олар екеу: оның бірі – Ұлығ Талас, яғни үлкен, екіншісі ислам шекарасында – Куми Талас», – деп жазыпты.
Сонымен қатар белгілі ғалым Л.Н.Гумилев өзінің атақты «Хундар» атты ғылыми-зерттеу кітабында: «Талап алынған мол олжаны енді сақтайтын орын қажет болады. Талас өзенінің алқабынан Шөже өзі мен әскеріне арнап бекініс салдырады. 500 адам он екі жыл бойы салады. Ол жер дуал мен күзет мұнаралары бар екі қабат ағаш қабырғамен қоршалады, осыдан-ақ бұған Римнің қорғану бекіністерін салу тәжірибесі әсер еткені байқалады. Бұл бекіністің гарнизонында жүзден аса жаяу әскер тұрған, олар римдіктер болған деседі», – деп Хун Тәңірқұты Шөженің көне Тараз қаласын қалай және не үшін салғанын атап өтеді. Аталған еңбекке жүгінсек, бұл – біздің заманымызға дейінгі шамамен 40-шы жылдар болатын. Міне, осы кезден бастап көне Тараз қаласының тарихы басталды деуге болады. Бірақ сол кездегі Қытай империясының Шөжені бағындыру мақсатында Чэнь Тань сияқты тәжірибелі де білікті қолбасшысы басқарған көп әскер жіберіп, Шөжені талқандауы барысында б.з.д. 36 жылы Тараз қаласы да қирап тынады.

Алайда шаһар мүлдем жойылып кетпеді. Қираған қала қаншама уақыттардан соң басын қайта көтеріп, VI ғасырдағы Түрік қағанаты кезінде қайта гүлдене бастайды. Бірақ бұл кезде қаланың атауы өзгеріп, Талас қаласынан Тараз қаласына айналған болатын. Сондай-ақ 10-12 ғасырларда қала өркендеп, ғылым мен білімнің, мәдениет пен сауданың ошағына айналды.
Сондай-ақ XIII ғасырда ауыр дүрбелең салдарынан қаланың дамуы саяси тұрғыдан тежелген болса да, 1269 жылы Шағатай ұлысының ханы болып сайланған Қайду ханның тұсында Тараздың тамырына қан жүгірді. Сол жылдары көне шаһар «Ианги Тараз», яғни «Жаңа Тараз» деген атаумен тарихқа енеді. Ал Алаш тарихында «Ақтабан шұбырынды, Алқакөл сұлама» деген атпен қалған XVII-XVIII ғасырлардағы жоңғар шапқыншылығы оңтүстік қазақ өңірлерін қайта жаулап алуымен және XVIII ғасырдың 50-ші жылдарының ортасына дейін шаһар жоңғарлардың билігінде болды. Мұны ежелгі қонысты қазу кезінде табылған өрт іздері айғақтайды.
Бұдан кейін Талас алқабының жоғарғы жағын 1815-1858 жылдары аралығында Қоқан хандығы жаулап алып, өз құрамына кіргізді. Бірақ Қоқан хандары Тараз қаласын қиратпай, қайта ол жерге өз иеліктерін қорғау мақсатында жаңа бекініс орнатып, көне Тараз қаласын қайта жандандырды. Осыдан бастап қала атауы Қарахан империясы ақсүйектерінің ірі өкілі әрі өз заманында Тараз қаласын билеген, халық киелі де қасиетті санаған Шах Махмуд Қарахан бабаның құрметіне «Әулиеата» деп атала бастады. Ал 1864 жылы Қоқан хандығы бекінісіндегі Әулиеата қаласын Ресей патшалық үкіметінің әскерлері бекіністі шабуылдау кезінде жаулап алды. 1867 жылы қала Түркістан генерал-губернаторлығының Сырдария облысы құрамына еніп, көп ұзамай аттас уездің орталығына айналды.
1938 жылы қала халық ақыны Жамбыл Жабаевтың есімін алды. Мұнда бұрын-соңды болып көрмеген жыр алыбы бұл жаңалықты екіұшты қабылдағаны белгілі. Бұл айтулы сәт туралы ел аузында таралған әңгіме де бар. Қалаға аты берілгеннен кейін ақынды шақырып, зор қошеметпен күтіп алады. Пойыздан түсе салған Жамбыл Жабаев жерге тізерлеп отырып: «Атыңнан айналайын, Әулиеата, атыңды тартып алсам, болма қапа!», – деп бетін сипап, содан кейін ғана халыққа мойын бұрған екен.
«Мың өліп, мың тірілген» халқымыз 1991 жылы ата-баба аңсаған азат күнге жетті. Қазақ мемлекеті тәуелсіздікке қол жеткізгеннен кейін 1997 жылы 7 қаңтарда Қазақстан Республикасы Президентінің Жарлығымен қаламыздың ежелгі аты қайтарылып, Тараз атанды. Тараз қаласының салынғанына 2000 жыл толуы әлемдік деңгейде 2002 жылдың 25-26 қыркүйегінде тарихта мәні зор оқиға ретінде кең көлемде атап өтілді. Шаһардың 2000 жылдығына орай көптеген тарихшы ғалымдар ғылыми зерттеу жұмыстарын жүргізіп, көп жылдар бойы белгісіз болып келген тарихтың жаңа беттерін ашып, қала тарихының дамуына елеулі үлес қосты.
Ал 2011 жылы басталған ежелгі қоныстың археологиялық қазбалары аймақтың екі мың жылдық тарихының бірегей жәдігерлерін тапты. Осылайша күннен-күнге жанданып, аңыздармен көмкерілген ежелгі қала өз тарихының жаңа кезеңіне қадам баcты.
Сонымен бірге 2015 жылы шаһар төрінде ұлт рухын көтерген ұлы дүбірлі той өтті. Атап айтқанда, сол жыл Қазақ хандығының 550 жылдық мерейтойын мерекелеу жылы болып есте қалды. Бұл дүбірлі тойдың біздің топырақта өтуінің өзіндік негізі бар. Себебі біздің аймақ – Жәнібек пен Керей хандар қазақ мемлекеттігінің негізін қалаған қасиетті өлке. Айтулы мерейтойдың негізгі салтанатты шараларының бірі – Тараздың батысындағы кіреберісте «Қазақ хандығының 550 жылдығы» атты ескерткіштің ашылуы болды. Бүгінде бұл нысан Таразға табан тіреген туристер мен шаһар жұртының тынығатын орнына айналған.
Сонымен қатар салтанатты шарада Таразда көне қалашықтың археологиялық қазба жұмыстары жүргізіліп отырған бұрынғы «Көк базардың» орнында «Көне Тараз» археологиялық паркі ашылды. Әрі мерейтой аясында Таразға ҚХР-дың Сиань қаласынан Ұлы Жібек жолының бағдарымен бір жылға жуық жүрген шай керуені келген болатын.
2018 жылы тарихи Тараздың сәулеттік кескін-келбетін жаңарту мақсатында Бауыржан Момышұлы атындағы «Жеңіс» саябағы қайта жөндеуден өтіп, саябақ ішінен «Ерлік» мемориалдық кешені ашылды. «Үшбұлақ» каналының жағалауы абаттандырылды. Халық Қаһарманы Қайрат Рысқұлбеков атындағы саябақ толық жаңғыртудан кейін ел игілігіне берілді. «Желтоқсан-86» орталығы, Шахмат алаңшасы, балалар ойын алаңы, сондай-ақ «Ғибрат» орталығы ашылды. «Желтоқсан» аллеясында ұзындығы 220 метрді құрайтын республика көлеміндегі ең ұзын субұрқақ іске қосылды.
Ал 2019 жылы Ы.Сүлейменов көшесінің бойына орналасқан «Атшабар» аллеясы көркімен көз тартатын «Жастар аллеясына» айналды. Ұлыстың ұлы күні Наурыз мейрамына орай ашылған демалыс орнында «Ұлы Дала ұландары» стеласы, «Білім» алаңы, «Jastar» қабілет орталығы, «Кітап» ескерткіші, LED экран мен сахна алаңшасы бой көтеріп, заманауи үлгідегі 2 субұрқақ іске қосылды. Сонымен бірге Жамбыл облысының 80 жылдық мерейтойына орай Тараз қаласында халқымыздың көне өркениетін айшықтайтын «Көне Тараз» тарихи-этномәдени кешені мен «Тектұрмас» этно-тарихи кешені халық игілігіне берілсе, 2021 жылы ел Тәуелсіздігінің 30 жылдығына орай шаһарда «Анаға тағзым» орталығы ашылды.
Сондай-ақ 2022 жылы Тараз шаһары Дүниежүзілік қолөнершілер қаласының тізіміне енген болатын. Дерекке жүгінсек, қолөнершілер қалаларының жаһандық тізімін қалыптастыру жұмысы 2014 жылдан бастап жанданыпты. Дүниежүзілік ұйымға қазіргі кезде әлемнің 25 елінің 65 қаласы енген. Көне Тараз бұл тізімге 56-шы қала болып кірген екен. Ықылым заманнан бері сауда-саттықтың ордасына айналған, қолөнер шеберлерінің тамаша туындыларымен байырғы дәуірден-ақ талайларды тәнті еткен тарихи қаланың мұндай мәртебені алуы заңдылық.
Сонымен бірге биылғы мамыр айында Тараз қаласында «Көне қамал» тарихи нысанының салтанатты ашылу рәсімі өтті. Жалпы, «Көне қамал» – «Тектұрмас» этно-тарихи кешенінің жалғасы. Оң қабырғасы жасанды тастармен қапталған, ұзындығы 220 метрге жететін қорған ортағасырлық архитектура үлгісімен бой көтерген. Міне, осындай қайталанбас ғұмырды бастан өткеріп, талай замандардан сыр шерткен, шығыс шайырларының жырына арқау болған Тараз бүгінде жаңаша тыныс алып отыр. Қала екі ауданға бөлініп, оларға терең тарих пен асыл дәстүрді айшықтайтын Әулиеата және Жібек жолы деген атаулар берілді.
Сүйікті шаһарымыз осылайша шырайланып, заманауи құрылыстар бой көтеріп, сәулеті мен дәулеті жарасқан ғимараттар керегесін кеңге жайып, көне қалаға жаңа келбет сыйлап көшелері көркейіп, саялы саябақтары жасарып, тарих пен жаңашылдықты тоғыстырған еңселі өңір орталығына айналып келеді.

Жұматай КӨКСУБАЙ