Қос кітаптың таныстырылымы өтті

Аяулы аналар мен қыз келіншектердің мерекесі қарсаңында «Шерхан Мұртаза атындағы руханият және тарихтану» орталығының ұйымдастыруымен «Әулиеата – кітап оқитын өңір» жобасының аясында Тараз аруларының мәртебесін өсіру, өңіріміздің даралығын таныту мақсатында «Мөп-мөлдір көздің қарасын…» жәнеде өңірімізге белгілі тұлғаның аналары туралы естеліктері, сыр-сұхбаттары жинақталған «Менің анам» кітабының таныстырылымы өтті.

Кітаптың таныстырылымы орталықтың директоры Жасұлан Әбдіманаптың алғы сөзімен бастау алып, аналарға, аруларға, кітап авторларына деген жылы лебізін көпшілік қауымға жеткізді. Сонымен қоса бұнымен тоқталып қалмай, алда он жеті жоба іске асатының атап өтті. Сондай-ақ «Менің анам» кітабы дәстүрлі түрде жылда жалғасын табатының айтты.

Кітаптың жарыққа шығуы – бұл жай ғана жаңа туындының оқырманға жол тартуы емес, бұл – тұтас бір әлемнің есігін ашу. Қашанда ең қымбат дүниелер сандыққа сақталғанын білеміз. Онда құнды жәдігерлер, асыл мұралар жиналатын. Кітап та дәл сондай құнды қазына. Ол – ойдың жемісі, еңбектің нәтижесі, рухани байлықтың белгісі. Осы ретте «Менің анам» кітабының құрастырушысы Айжан Өзбекова мен «Мөп-мөлдір көздің қарасын…» кітабының құрастырушы Ғазиза Ақмахан сөз сөйлеп, алтын сандықтан өздері жинақтаған кітапты алып, оқырман қауымға, ақ жаулықты  аналарға  табыстады.